'මව්බිම' ගවේෂණයට මෙවර මුල් වූයේ පුවත්පත් දැන්වීමකි. 'නන්දිකඩාල් කළපුවේ සුවය විඳීමට එන්න' නන්දිකඩාල් කළපුවේ ඉදි කළ නිවාඩු නිකේතනය පිළිබඳ එම දැන්වීම මෙවර 'මව්බිම' ගවේෂණයට පාර කියන්නට විය.

මීට අවුරුදු හතරකට පෙර ත්‍රිවිධ හමුදාව විසින් ක්‍රියාත්මක කරන ලද මානුෂීය මෙහෙයුමේ විජයග්‍රාහී භූමිය වූයේ නන්දිකඩාල් කළපුවයි. නන්දිකඩාල් කළපුවේ එහා ඉවුරේ ත්‍රස්තවාදීන් විසින් ප්‍රාණ ඇපකරුවන් ලෙස තබාගන්නා ලද දහස් සංඛ්‍යාත දමිළ වැසියන්ගේ ජීවිත යුද හමුදාවේ මානුෂීය දෑත් මතින් මෙගොඩ කළේ නන්දිකඩාල් කළපුවේ දිය කඳ මැද්දෙනි. ධීවර කර්මාන්තයෙනුත් බිජුවට වපුරා මහා අස්වැන්නෙන් ස්වයංපෝෂිත වූ නන්දිකඩාල් කළපුවෙන් එහා ඉමේ ජීවත් වූ දමිළ වැසියන්ගේ ජීවිත පිරී ඉතිරී තිබුණු යුගයක කඳුළු නටබුන් හමුවේ මම මෙහා ඉමේ බලා සිටිමි.

මුලතිව් යුද හමුදා ප්‍රධාන මූලස්ථානය යටත් පාලනය වන 'Lagoons Edge' නිවාඩු නිකේතනයේ නැවුම් තේක්ක ලී සුවඳිනුත් නන්දිකඩාල් කළපුවේ සිහිල් සුළඟෙනුත් මට ඇති වූයේ නැවුම් බවකි.

'Lagoons Edge' නිවාඩු නිකේතනයේ සිට මම කතාවට මුල පුරමි.

වසර 30ක යුද්ධයේ ඓතිහාසික විජයග්‍රාහී භූමිය වන නන්දිකඩාල් කරුණු කාරණා කිහිපයකට මුල්වෙයි. වේළුපිල්ලේ ප්‍රභාකරන් අවසන් හුස්ම හෙළුවේ මෙම කළපුව යාබද වීම, L.T.T.E. නායකයන් විශාල ප්‍රමාණයකගේ නිවෙස් පිහිටා තිබීම, L.T.T.E. සංවිධානයේ මහවිරු පවුල් පිහිටා තිබීම, එම සංවිධානයේ අවසානය දක්වා සටන් කර පරාජයට පත් L.T.T.E. ත්‍රස්තවාදීන් විශාල ප්‍රමාණයක් රජයේ හමුදාවට බාර වූ ස්ථානය වීම වැනි විශාල ජයග්‍රාහී කාරණා රැසකට මුල්වූ නන්දිකඩාල් කළපුව යුද්ධය පැවැති සමයේ ජීවිත විශාල ප්‍රමාණයක් සඟවාගෙන ඇති ස්ථානයකි. දැන් එම භූමියේ නිවාඩු නිකේතනයක් ඉදි වී ඇත. මෙම නිකේතනයේ සුවිශේෂීතාව වනුයේ සියලුම ඉදිකිරීම් තේක්ක ලීයෙන් නිම කර තිබීමයි.

එපමණක් නොව බිත්ති සැරසිලි, ඇඳ, පුටු, මේස සියලුම දේ තේත්ක ලීයෙන් පමණක්ම නිම කර තිබේ. එක්වර අට දෙනකුට ලැගුම් ගත හැකි මෙම නිවාඩු නිකේතනයේ සුවපහසුකම් ගැන කියාවත්, ලියාවත් නිමකිරීමට නොහැකි තරමට අතිශය අලංකාරය.

= කොච්චර කාලයක් ගියාද මේක හදන්න?

මාස හතක් විතර.

= කවුද මේකෙ නිර්මාණ ශිල්පියා?

සියලුම දේ සිදුවූයේ යුද හමුදාවේ සොල්දාදුවන් අතින්. සැලසුම්, ඉදිකිරීම් මේ හැම දෙයක්ම.

= ඔය ඉස්සරහ තියෙන පරණ කාර්එක කාගෙද?

L.T.T.E. එකේ.

= ඒ කිව්වේ?

එයාලා පාවිච්චි කරපුවා. දවසක් මෙතැනට ආපු සුද්දියක් මේක දැකලා ලක්‍ෂ පහකට ඉල්ලුවා.

නිකේතනය බාර නිලධාරියාගේ කතාබහත් සමඟම 'Lagoons Edge' දින දෙකකට අපේ ලැගුම් නවාතැන්පොළ විය.

ජීවිතේ කවදාම හෝ දවසක ඔබද මේ අත්දැකීම විඳිය යුතුය. එය එතරම්ම අපූර්ව අත්දැකීමකි. ශ්‍රී ලංකා යුද හමුදාවේ ඇති විනය මෙන්ම එම නවාතැන්පොළේ ඇති පිළිවෙළත්, පිරිසුදුකමත් අති විශිෂ්ටය.

අපි මෙතැනට එන හැමෝම නන්දිකඩාල් කළපුවත්, මුලතිව් කැලේ තියෙන L.T.T.E. සංවිධානයේ ගොඩක් දේවල් බලන්න එක්කරන් යනවා.

අපි රාත්‍රියට ඉඩ දුන්නෙමු.

මේ කළපුව කවදා හරි හිඳුණොත්, පතුලේ මොනතරම් ජීවිත ඇත්ද. ත්‍රස්තවාදී වෙඩි උණ්ඩයෙන් පසාරු වූ රණවිරුවන්ගේ හදවත් මෙන්ම, ත්‍රස්තවාදීන්ගේ ජීවිතද මෙම දිය කඳ පතුලේ ඇටසැකිලි වී එකට වැතිර ඇති බව නිසැකය. සඳඑළියට නළියන දියරළ ජීවිතයේ නිස්සාර බව පසක් කරයි.

ප්‍රභාකරනුත්, සුසේයිත්, ප්‍රභාකරන්ගේ දරුවනුත් මියැදුණේත් ත්‍රස්තවාදීන්ගේ රුදුරු වෙඩි උණ්ඩයෙන් අපේ රණවිරුවන්ගේ රුධිර ධාරා ගලා ගියේත්, මේ ජලකඳේම විය හැකිය. තවමත් අවුරුද්දකට නොවැඩි මෙම අලංකාර නිකේතනය විවෘත කර ඇත්තේ ජනාධිපති මහින්ද රාජපක්‍ෂ මහතා අතිනි. මුලතිව් සංචාරයේ නිරත වන බොහෝ අයට ඇති ගැටලුව වන්නේ නවාතැන් ප්‍රශ්නයයි. ඒ සඳහා 'Lagoons Edge' නිවාඩු නිකේතනයට අමතරව ගී්‍රන් හවුස් නමින් තවත් නිකේතනයක් මුලතිව් යුද හමුදා මූලස්ථානය මඟින් පාලනය වෙයි. නවාතැන් ගන්න අයගේ රුචිකත්වය මත ආහාරපානද, මුලතිව් කැලය මැද්දේ ෆාරා නැව, ත්‍රස්තවාදීන්ගේ පිහිනුම් තටාකය, මුහුදු කොටි නායක සුසේයිගේ නිවෙස, ත්‍රස්තවාදීන්ගේ ආයුධ, ප්‍රභාකරන් මැරුණු තැන, ප්‍රභාට අයිති පලතුරු වත්ත මේ හැම දෙයක්ම බලන්න පුළුවන.

ඇත්තටම මුලතිව් සංචාරය කරන බොහෝදෙනා මෙම නවාතැන්පොළ පිළිබඳ නොදන්නවා විය හැකිය. එක්වර අට දෙනකුට නවාතැන් ගත හැකි මෙම නිකේතනය සඳහා දැනට මිල ගණන් නියම කර ඇති ආකාරයට දිනකට ගාස්තුව වෙන්නේ රුපියල් 15,000කි.

අඩු මුදලකට ලැබෙන අධිසුඛෝපභෝගී මෙම අත්දැකීම තුළ මමත් ඡායාරූප ශිල්පි ප්‍රියන්තත්, රාත්‍රියට සූදානම් වෙමින් සිටියෙමු.

ලී දඬුවලින් නිමාකර ඇති අතිශය සුන්දර රාත්‍රි සාද පවත්වන ස්ථානයද නවාතැන් ගන්න අයට ලැබෙන විශේෂ පහසුකමකි.

රාත්‍රිය මැදියම් වෙමින් පවතියි. වෙඩිවරුසා නතර වූ බිමක තරු වැස්සක් මෙන් කළපු දිය මතට සඳ එළිය දියවී ඇත. මියැදුණු ලක්‍ෂ සංඛ්‍යාත මිනිස් ජීවිතවල කඳුළත්, සුසුමත් මරළතෝනිත් නිහඬ වී හමාරය. එතරම්ම මේ රාත්‍රිය නිහඬය. සීතලය. කළපුවෙන් එහා ඉමේ මියැදුණු ජීවිත කතාත් ජීවත්වන මිනිසුන්ගේ බලාපොරොත්තුත් සොයා හෙට උදේම පිටත්විය යුතුය. ඔබ ලබන සතියේ හමුවන්නේ ඒ අත්දැකීම් සමූහයේ අකුරු වියමන ළඟිනි.

ලබන සතියට...

සංජක ප්‍රසාද් ‍ෙදාලේවත්ත