පොල්ගස්ඕවිට, වෑතර ප්රදේශයේ ජීවත් වූ ඔහු තවමත් අවුරුදු 18 නොඉක්ම වූ යෞවනයෙකි. ආවේගශීලීත්වය ආක්රමණශීලීත්වය නිසාම ඔහු නොයෙක් වර තම පාසලේ ගුරුවර ගුරුවරියන්ගේ ද කතාබහට ලක් වූවේය. නමුත් ඔවුන්ගේ කතාබහට තේමා වූයේ ඔහුගේ යහපත් ගතිගුණවලට වඩා දඩබ්බරකම් පිළිබඳවය.
කුඩා අවධියේ සිටම සිය පියාගේ ආදරය, සෙනෙහස අහිමි වීමත්, මවගේ විදේශගතවීමත් නිසා ඔහුට දුක සැප බෙදා හදා ගන්නට සිටියේ ඔහුගේ වයෝවෘද්ධ මිත්තණිය සහ මාමාවරුන් පමණි. එහෙත් දිනෙන් දින කරදඬු උස්මහත් වන ඔහුගේ දඩබ්බරකම් මෙල්ල කිරීමට නම් ඔවුනට හැකිවූවේ නැත.
“ඕකට කියනවට වඩා හොඳයි කට බිම උලා ගන්න එක”යි සිතූ ඔහුගේ ඥාති මිත්රාදීහු ඔහුට රිස්සක් කරගන්නට ඉඩදී බලාගෙන සිටියහ. අපි ඔහුව සමන් ලෙසින් හඳුන්වමු. මෙතැන් පටන් දිග හැරෙන්නේ ඔහුගේ කතාවයි.
මේ වසරේ අධ්යයන පොදු සහතික පත්ර උසස් පෙළට පෙනී සිටි සමන් එයින් ප්රමාණවත් ප්රතිඵල ලබා නොගත් නිසා දෙවන වරට විභාගයට පෙනී සිටීමට උපකාරක පන්තිවලට සහභාගි විය. අමතර පන්ති යන අතර තුරදී නිතරම හමුවූ තම පාසලේ ඉගෙනුම ලබන රූමත් ශිෂ්යාවක් හා ඔහු පෙමින් බැඳුණේය.
එහෙත් ඒ කුලුඳුල් ප්රේමයට වැඩි ආයුෂ තිබුණේ නැත. ටික දිනකින්ම පාසලේ ගුරුවරුන්ට දෙදෙනාගේ ප්රේම වෘත්තාන්තය පිළිබඳ ඉව වැටිණි. සමන්ව පාසලට ගෙන්වූ ගුරුවරියන් ඔහුට අවවාද කළේ අනවශ්ය සබඳතා නතර කර දමා අධ්යාපන වැඩ කටයුතුවලට උනන්දු වන ලෙසයි.
ඉදිරියට තැබූ පියවර නැවත ආපස්සට ගන්නට සමන් කිසිදු අයුරකින් සූදානම් වූයේ නැත. ගුරුවරුන්ගේ අවවාද අනුශාසනා කනකටවත් නොගත් ඔහු පාසල තුළදීම ප්රසිද්ධියේ තම පෙම්වතිය ඇසුරු කිරීමට පටන් ගත්තේය. අඳුරු අහුමුලුවලට වී පෙම්බස් ෙදාඩන ඔවුන් දෙපළ පිළිබඳ පාසලේ විදුහල්පතිගේද අවධානය යොමු වූවේය.
පාසලේ ඉගෙනුම ලබන අනෙක් දරුවන්ට වැරැදි පූර්වාදර්ශ සපයමින් පාසලේ විනය කඩකරමින් අශෝභන ලෙස හැසිරෙන යොවුන් පෙම්වතුන් යුවළට අවවාද කිරීමට සිතූ විදුහල්පතිවරයා ඔවුන් දෙදෙනාට එරෙහිව විනය කමිටුවද කැඳවා විනය පරීක්ෂණයක්ද පැවැත්වූවේය.
අවසානයේ සමන්වත්, ඔහුගේ පෙම්වතියත් තම කාර්යාලයට ගෙන් වූ විදුහල්පතිවරයා මෙසේ කියමින් දෙදෙනාට තරයේ අවවාද කළේය.
“ඔය දෙන්නම තවම පොඩි ළමයි, මොනවද මේ කරන නොගැළපෙන වැඩ, අනිත් එක ප්රසිද්ධියේ. ඔයාල ඉස්කෝලෙ ඉන්න නංගිලා, මල්ලිලාටත් වැරැදි ආදර්ශයක් දෙන්නෙ. ඔයාලට ඉගෙනීම එපා වෙලා නම් ගෙවල්වලට කියලා කසාද බඳින්න. මං මේ ගෑනු ළමයගේ දෙමාපියන්ටත් මේ ගැන දැනුම් දෙනවා.”
සමන්ගේ පෙම්වතිය දෑසේ කඳුළු පොකුරක් පුරවාගෙන පන්ති කාමරය වෙත දිව ගියාය. කාර්යාලයෙන් එළියට බැසගත් සමන්ට මුණ ගැසුණේ ගුරුවරියන් සිවු දෙනෙකි.
“හරි අපූරුයි හැදෙන හැටි, දෙමාපියන්ටත් ලැජ්ජා කරනවා. ඔයා ආයෙ ඉස්කෝලේ පැත්ත පළාතෙ එන්න ඕන නෑ. ඔයා දැන් පාසල් ශිෂ්යයෙක් නෙමෙයිනේ. දැන් මෙතන තවත් රස්තියාදු නොවී කරුණාකරල යන්න”
ගුරුවරියන්ගේ වාග් ප්රහාර ඔහුට වහ කදුරු මෙන් විය. ජනේල අස්සෙන් ඔළුගෙඩි එළියට දමාගෙන විරිත්තමින් බලා සිටි පාසල් ශිෂ්යයන්ගේ සමච්චල්සහගත මුහුණු දුටු සමන්ට ඇති වූයේ දැඩි ලැජ්ජාවකි. වහාම පාසල් භූමියෙන් එළියට බැසගත් සමන් පාසල ඇරෙන තෙක් සැඟවී සිටියේ තම පෙම්වතිය පැමිණෙන තුරුය.
එහෙත් ඇය ඔහු වෙත පැමිණියේ නැත. ඇය වෙනුවට පැමිණියේ ඇගේ යෙහෙළියකි.
“සමන් අයියේ එයා ආයෙ ඔයාව බලන්න එන්නෙ නෑ කිව්වා, ගෙදර අය දැන ගන්න නිසා එයා මේ සම්බන්ධෙ නතර කරනවා කිව්වා”
ඔහුට දැනුණේ ඔහුගේ සමනල් සිහින සියල්ල තම පය පාමුල විසිරී යන ආකාරයකි. හවස් වන තෙක් රස්තියාදු ගැසූ සමන් රාත්රි ජාමයේ නිවෙසට සේන්දු වූවේය. රාත්රි කෑම වේල මේසය මත තැබූ අත්තම්මා කන්න කියා ඇවිටිලි කරද්දී සමන් අත්තම්මාටද සැර දමමින් කාමරය වෙත ගියේය.
“මුන් නිසානෙ මට සේරම දේවල් වුණේ, මට ලැජ්ජා කළා මදිවට මගේ ආදරෙත් මට නැති කළා. මං හොඳ පාඩමක් උගන්නන්නම් කෝ”යි සිතූ සමන් යහනෙන් නැඟිට සිය පරිගණකය වෙත ගියේය. වහාම පරිගණකය ක්රියාත්මක කළ සමන් එහි තිබූ ෆෝල්ඩර් පිරික්සන්නට පටන් ගත්තේය.
එහි තිබූ ඡායාරූප එක පෙළට පරිගණක තිරය මත දිස්වෙන්නට විය. එක විටම ඔහුගේ ඇස නතර වූයේ ගිය වසරේ කලා උළෙලේදී ලබා ගත් ඡයාරූපයක් අසලයි. එහි සිටියේ විදුහල්පතිවරයා සහ තමාව අපහසුතාවට ලක්කළ ගුරුවරියන් සිවු දෙනා පමණි. “මේ තියෙන්නේ මට ඕන දේ” සිතූ ඔහු පරිගණකයේ සියුම් තාක්ෂණික උපක්රම භාවිත කරමින් එය ව්යාජ ලෙස සකස් කරන්නට පටන් ගත්තේය.
ක්ෂණියකින් කලා උළෙල නාන තටාකයක් බවට පත් වූවේය. විදුහල්පතිවරයා උඩුකය නග්නව නාන තටාකයේ ගිලී සිටි අතර තරුණ ගුරුවරියන් සිවු දෙනා නාන ඇඳුම් ඇඳගෙන සරාගී ලීලාවෙන් විදුහල්පතිවරයාට සමීපව සිටියහ. අවසාන ප්රතිඵලය දෙස ජයග්රාහී ලීලාවෙන් බලා සිටි සමන් “දැන් දෙන්නම්” කියමින් තම ෆේස් බුක් ගිණුම විවෘත කර ගත්තේය. තමා ව්යාජව නිර්මාණය කරගත් ඡායාරූපය ෆේස් බුක් ප්රොෆයිලය වෙතට ගත් සමන් තමාගේ, ගිණුමෙහි සිටින සියලු මිතුරන්ගේ ෆේෂ් බුක් ගිණුම්වලට එම ඡායාරූපය යවන්නට පටන් ගත්තේ ක්රීඩාවක් කරනවා මෙනි.
ඔහු එම ඡායාරූපය සිය මිතුරන් වෙත යැවුවේ “මෙන්න ඇත්ත” ලෙසින් සිරස්තලයක්ද යොදමිනි. එම ඡායාරූපයට ලැබෙන අසභ්ය ප්රතිචාර වදන් දෙස බලමින් සමන් වින්දේ දැඩි සතුටකි.
සිද්ධියෙන් දින කීපයක් ගෙවී යන්නට විය. මේ අතර දිනක් සමන් ව්යාජව සැකසූ ඡායාරූපයේ සිටි එක් තරුණ ගුරුවරියකගේ ජංගම දුරකතනයට මිතුරෙකුගෙන් ඇමැතුමක් ලැබිණි. “මොනවද අර දාල තියෙන ජරා ෆොටෝ” බිකිනි ඇඳගෙන නාන තටාකවල බැහැගෙන, ඔයා ගුරුවරියක් නේද? කරුණාකරල මිනිස්සු හිනස්සන්නෙ නැතිව එෆ්. බී. එකෙන් ඒක අයින් කරන්න. මිතුරාගේ වදන් ඇයට අදහාගන්නට හැකි වූයේ නැත. වහාම තම ෆේස් බුක් ගිණුම විවෘත කර ඇය තම ඡායාරූපය දැක හිසෙහි දෑත් ගසා ගත්තාය. පාසල වෙත කඩිමුඩියේ දිව ගිය ඇය සෙසු මිතුරු ගුරුවරියන්ටත් විස්තරය පවසා විදුහල්පතිවරයා මුණගැසීමට ගියාය.
ඡායාරූපය දුටු විදුහල්පතිවරයාගේ තොල කට සිඳී ගියේය.
අපි මේ ගැන පොලිසියට පැමිණිලි කරමු. ඔවුහු පස් දෙනාම කහතුඩුව පොලිසිය වෙත ගියහ.
“මහත්තයෝ මේක කවුරුහරි ඔයාලගෙන් පළිගන්න හිතාගෙන, තරහට කරපු දෙයක් කියලයි මට හිතෙන්නේ, කවුරු හරි සැකයිද?”
පස් දෙනාටම එක විටෙම සිහි වූවේ පසුගිය දිනෙක අවවාද කර පාසලෙන් පිටත් කළ සමන්වය. සමන් පිළිබඳ පොලිසියට පැවැසූ විදුහල්පතිවරයා සමන්ගේ දඩබ්බරකම් පිළිබඳවද පැවැසුවේය. වහාම ක්රියාත්මක වූ කහතුඩුව පොලිසිය සමන්ව සොයාගෙන ඔහුගේ නිවෙසට ගියේය.
පොලිසිය එහි යනවිටත් සමන් සිටියේ සිය පරිගණකය හරහා අන්තර්ජාලයේ සැරිසරමිනි. පොලිසිය දුටු සමන් බියට පත්වී කතා කරගන්නට පවා නොහැකි වූවේය. සමන්ගේ ඉරියව් දුටු පොලිසිය සමන්ගේ පරිගණකය පරීක්ෂා කරන්නට පටන් ගත්තේය. එහි තිබූ අසභ්ය වීඩියෝ දර්ශන සහ ව්යාජව සැකසූ පාසලේ විදුහල්පති හා ගුරුවරියන් නාන තටාකයේ සිටි ඡායරූපයත්, ජීවමානව සිටි විදුහල්පතිවරයාට ගසා තිබූ මරණ දැන්වීමක් ද සොයා ගන්නට පොලිසිය සමත් විය.
තමන් කළ සියල්ල පාපෝච්චාරණය කරනවා හැරෙන්නට සමන්ට කරන්නට දෙයක් තිබුණේ නැත.
“මං මේක කළේ තරහට. මං මේ ෆොටෝ එක ෂෙයාර් කළේ යාළුවන්ට විතරයි. මේක මේ තරම් දුර යයි කියලා මං හිතුවේ නෑ. අනිත් එක නීතියෙන් දඬුවම් ලැබෙන වරදක් කියලා මං දන්නෙත් නැහැ.”
දැන හෝ නොදැන සමන් කර තිබුණේ දැඩි දඬුවම් ලැබිය හැකි වරදකි. එහෙත් පොලිසියට සමන්ට එරෙහිව නීතිය ක්රියාත්මක කිරීමට සිදුවිය. වැඩිදුර පරීක්ෂණ කරගෙන යෑම අපරාධ විමර්ශන ඒකකය සඳහා භාර වූවේය.
මවුපියන්ගේ සෙනෙහස රැකවරණය අහිමි වූ සමන් තම දිවියේ හුදෙකලා බව නැතිකර ගත්තේ අන්තර්ජාලය හා එක් වෙමිනි. එහෙත් එහි ඇති අයහපත් පාර්ශ්වය පිළිබඳ ඔහු දැනුම්වත් වී සිටියේ නැත. එනිසා සමන්ට සිදුවූයේ අන්තර්ජාලය හා සමාජ වෙබ් අඩවි අයථා ලෙස පරිහරණය කරන්නට යෑමෙන් නීතිය ඉදිරියේ වරදකරුවකු වීමටය.
අරුණි මල්ලවආරච්චි
ප්රේමලාල් විජේරත්න
