අර්බුද මැද කටාර් රාජ්‍යය සහ ඇමරිකාව අතර ගිවිසුමක්

  👤  702 readers have read this article !
Published by : MB WEB 2017-07-12 15:36:00

ත්‍රස්තවාදයට මූල්‍යාධාර ලබා දීම මැඩලීමේ උත්සාහයක් වශයෙන් එක්සත් ජනපදය සහ කටාර් රාජ්‍ය සම්මුතියකට පැමිණ තිබේ.

කටාර්හි නිල සංචාරයක නිරත ඇමරිකානු රාජ්‍යය ලේකම් රෙක්ස් ටිලර්සන් විසින් ඒ සම්බන්ධයෙන් වූ ගිවිසුමකට ඩෝහා අගනුවරදී අත්සන් තැබීය.

දෙරට අතර එවැනි ගිවිසුමකට අත්සන් තැබුණේ කටාර් රාජ්‍ය සහ සෞදිය ඇතුළු අසල්වැසි අරාබි රටවල් අතර රාජ්‍යය තාන්ත්‍රික අර්බුදයක් වර්ධනය වෙමින් පවතින අතරතුරදීය.

මැදපෙරදිග කලාපයේ ජිහාඩ් කණ්ඩායම්වලට සහ ත්‍රස්තවාදයට සහාය ලබා දෙන බවට චෝදනා කරමින් කටාර් රාජ්‍යය සමග පැවති සියලු සබඳතා අත්හිටුවීමට සෞදි අරාබිය, බහරේනය, ඊජිප්තුව සහ එක්සත් අරාබි එමීර් යන රටවල් කටයුතු කළහ.

අරාබි රටවල් අතර මතුව ඇති අර්බුදය විසඳීම සඳහා ඇමරිකාව මැදිහත්කරුවෙකු වශයෙන් කටයුතු කරයි.

එවැනි ගිවිසුමකට අත්සන් තැබීම තුළින් ත්‍රස්තවාදයට එරෙහිව සටන් කිරීම සඳහා විශ්වාසය තැබිය හැකි හවුල්කරුවෙකු වශයෙන් කටාර් රාජ්‍යය සලකනු බවට ඇමරිකාව සංඥාවක් ලබා දී ඇති බව විශ්ලේෂකයෝ පවසති.

කටාර් රාජ්‍ය සහ සෞදිය ඇතුළු අසල්වැසි අරාබි රටවල් අතර මතුව පවතින අර්බුදකාරී වාතාවරණය තවදුරටත් එලෙසෙම පවතී.

(BBC)


මව්බිම දැන්

තවදුරටත්

අද මව්‍බිමෙන්

තවදුරටත්