ඩයලොග් රන් කුසලාන වොලිබෝල් තරගාවලිය සැප්තැම්බර් 16දා ඇරැඹේ

ශ්‍රී ලංකා වොලිබෝල් සම්මේලනය ඩයලොග් ආසියාටා සමාගමේ අනුග්‍රහය ඇතිව පවත්වනු ලබන "ඩයලොග් රන් කුසලාන" වොලිබෝල් තරගාවලිය සැප්තැම්බර් 16වැනිදා සිට ආරම්භ වේ.

මෙවර නව මුහුණුවරකින් පැවැත්වෙන මෙම තරගාවලියේදී විවෘත පිරිමි හා කාන්තා මෙන්ම අවුරුදු 22න් පහළ පිරිමි හා කාන්තා තරග පැවැත්වෙන අතර, තරගාවලිය සඳහා අයැදුම්පත් එවිය යුතු දිනය සැප්තැම්බර් 15දායින් අවසන් වීමට නියමිතය.

කෙසේ වෙතත් පසුගියවර මෙම තරගාවලියේ විවෘත කාන්තා හා පිරිමි ශූරතා පිළිවෙළින් කොස්වාඩිය විජය හා කටාන ඒකාබද්ධ කණ්ඩායම විසින් දිනාගන්නා ලද අතර, අවුරුදු 22න් පහළ කාන්තා ශූරතාව මාවතගම කැෂුවලයින් ක්‍රීඩා සමාජයත්, පිරිමි ශූරතාව සීදුව දිවිසමර ක්‍රීඩා සමාජ කණ්ඩායමත් දිනාගෙන තිබිණි.

තරගාවලියේ ආරම්භක උත්සවය වොලිබෝල් සම්මේලනයේ සභාපති රංජිත් සියඹලාපිටිය මහතාගේ ප්‍රධානත්වයෙන් 16වැනිදා කෑගල්ල රුවන්වැල්ල රාජසිංහ මධ්‍ය මහා විදුහල් පිටියේදී පැවැත්වෙන බවත්, මෙවර තරගාවලිය සඳහා කණ්ඩායම් 4000ක් පමණ සහභාගි වීමට නියමිතව ඇති බවත්, ශ්‍රී ලංකා වොලිබෝල් සම්මේලනයේ ලේකම් ඒ.එස්. නාලක මහතා "මව්බිම"ට පැවැසීය.