සිල් රෙදි නඩුව: හිටපු ජනපති ලේකම්, TRCSL සභාපති සිරගෙට

  👤  2292 readers have read this article !
Published by : MB WEB 2017-09-07 17:06:41

කොළඹ මහාධිකරණය විසින් හිටපු ජනාධිපති ලේකම් ලලිත් වීරතුංග සහ විදුලි සංදේශ නියාමන කොමිසමේ හිටපු අධ්‍යක්ෂ ජනරාල් අනූෂ පැල්පිට අවුරුදු තුන බැගින් බරපතල සිරදඬුවම් වලට යටත් කරනු ලැබුණි.

2015 ජනාධිපතිවරණ සමයේ විදුලි සංදේශ නියාමන කොමිෂන් සභාවට අයත් රුපියල් කෝටි හැටක් (මිලියන 600) වැය කරමින් සිල් රෙදි බෙදා දුන් බවට හිටපු ජනාධිපති ලේකම් ලලිත් වීරතුංගට සහ විදුලි සංදේශ නියාමන කොමිෂන් සභාවේ හිටපු සභාපති අනුෂ පැල්පිටට එරෙහිව නීතීපතිවරයා විසින් නඩු පවරා තිබුණි.

නීතිපති දෙපාර්තමේන්තුව මෙම නඩුව පවරා තිබුණේ රාජ්‍ය දේපොළ අවභාවිතා කිරීම සම්බන්ධයෙනි.

එම නඩුවේ තීන්දුව ප්‍රකාශයට පත් කළ කොළඹ මහාධිකරණ විනිසුරු ගිහාන් කුලතුංග චුදිතයන් අදාළ චෝදනාවලට වැරදිකරුවන් යයි ප්‍රකාශයට පත් කරමින් එම දඬුවම් නියම කළේය.

පොලිස් මූල්‍ය අපරාධ කොට්ඨාශය විමර්ශන අවසන් කර පවරන ලද නඩු සම්බන්ධයෙන් ප්‍රකාශිත පළමු තීන්දුව මෙයයි.

මෙම නඩුවේ දෙවැනි සහ තුන්වැනි වැරදි වෙනුවෙන් රුපියල් ලක්ෂ පනහ බැගින් රුපියල් කෝටියක (ලක්ෂ සීයක්) දඩ මුදලක් ගෙවන ලෙස වැරදිකරුවන්ට නියම කළ කොළඹ මහාධිකරණය එය සැප්තැම්බර් විසිවෙනි දිනට පෙර ගෙවන ලෙසත් නියෝග කළේය.

මෙය සමාජය තුළ හඳුන්වන ලද්දේ 'සිල් රෙදි නඩුව' යනුවෙනි.

(BBC)

අද මව්‍බිමෙන්

තවදුරටත්

අද පුවත්පත

අද කාටූනය

mawbima Cartoon