අතුරුදන්වූවන් පිළිබඳ කාර්යාලය පිහිටුවීමේ ගැසට් පත්‍රය නිකුත් වෙයි

අතුරුදන් වූ තැනැත්තන් පිළිබඳ කාර්යාලය පිහිටුවීමේ විධිවිධාන හෙට (15දා) සිට ක්‍රියාත්මක කෙරෙන ගැසට් නිවේදනය පෙරේදා (12දා) නිකුත් කෙරිණි.

ජාතික ඒකාබද්ධතා හා ප්‍රතිසංධාන ඇමැතිවරයාද වන ජනාධිපති මෛත්‍රිපාල සිරිසේන 2016 අංක 14 දරන අතුරුදන් වූ තැනැත්තන් පිළිබඳ කාර්යාලය පනත ඇතුළු 2017 අංක 09 දරන සංශෝධන පනතින් පැවැරී ඇති බලතල ප්‍රකාරව ඉකුත් සඳුදා (11දා) ගැසට් නිවේදනයට අස්සන් තබා ඇත.
ඒ අනුව පනතේ අදාළ විධිවිධාන ක්‍රියාත්මක වන දිනය 2017 සැප්තැම්බර් 15 වැනිදා බව ගැසට් නිවේදනයෙහි සඳහන්ය.

අතුරුදන් වූ තැනැත්තන් පිළිබඳ කාර්යාලය පිහිටුවීම, පරිපාලනය කිරීම සහ කර්තව්‍ය ඉටු කිරීම සඳහා වන විධිවිධාන හෙට සිට ක්‍රියාත්මක වීමට නියමිතය.
එම කාර්යාලය ජනාධිපතිවරයා යටතේ ක්‍රියාත්මක වන ජාතික ඒකාබද්ධතා හා ප්‍රතිසන්ධාන අමාත්‍යාංශය යටතේ ක්‍රියාත්මක වනු ඇති බව ජාතික සහජීවනය සංවාද හා රාජ්‍ය භාෂා අමාත්‍ය මනෝ ගනේෂන් මහතා "මව්බිම"ට පැවැසීය.
ඒ සඳහා තම අමාත්‍යාංශයේ සහාය ලබාදෙන බවද අමාත්‍යවරයා කීය.

අමාත්‍යවරයා සඳහන් කළේ මෙම කාර්යාලය ක්‍රියාත්මක කිරීම ප්‍රමාද වී ඇති බවත් ඒ අනුව නුදුරේදීම එම කාර්යාලයට නිලධාරීන් පත් කිරීම, ක්‍රියාත්මක කිරීමට අදාළ අනෙකුත් කටයුතු ජනාධිපතිවරයා විසින් ගනු ඇති බවත්ය.

මෙම කාර්යාලය ක්‍රියාත්මක වූ පසු මෙරට සිදුවූ සියලු අතුරුදන්වූවන් පිළිබඳ පැමිණිලි මීට ඉදිරිපත් කිරීමේ හැකියාව ඇති බව කී අමාත්‍යවරයා අතුරුදන්වූවන් පිළිබඳ සෙවීම ස¼දහා පත් කෙරුණු ජනාධිපති කොමිෂන් සභාවට ඉදිරිපත් කෙරුණු පැමිණිලිද මෙම කාර්යාලයට යොමු කෙරෙනු ඇති බව සඳහන් කළේය.
මෙම කාර්යාලය දුක බෙදා ගැනීමේ කාර්යාලයක් ලෙස ක්‍රියාත්මක වනු ඇති බවද හෙතෙම කීය.