ග්‍රීන් කාඩ් ලොතරැයි ක්‍රමය නවත්වන්න කටයුතු කරනවා

  👤  1839 readers have read this article !
Published by : MB WEB 2017-11-03 15:57:23

ඇමෙරිකා එක්සත් ජනපදයට සංක්‍රමණය වීම සඳහා පිටරැටියනට ලැබෙන අවස්ථාවක් වන ග්‍රීන් කාඩ් ලොතරැයි වැඩසටහන (Green Card Lottery Program) නවතා දමන ලෙස කොංග්‍රසයෙන් ඉල්ලීමට අදහස් කරන බව ඇමෙරිකානු ජනාධිපති ඩොනල්ඩ් ට්‍රම්ප් ප්‍රකාශ කර ඇත.

ට්‍රක් රථයක් පාපැදි ධාවන පථයට ධාවනය කරවමින් අට දෙනකුට මරු කැඳවූ ත්‍රස්ත ක්‍රියාවෙන් පසුව ජනාධිපති ඩොනල්ඩ් ට්‍රම්ප් මෙම ප්‍රකාශය කළේ එම ත්‍රස්ත ක්‍රියාව සම්බන්ධයෙන් සිය කෝපය පළ කරමිනි.

ත්‍රස්ත ක්‍රියාව කළ බවට සැකකරන උස්බෙකිස්තාන් ජාතික සායිෆුල්ලෝ සායිපොව් (Sayfullo Saipov) සතෙක්
(an Animal) ලෙසද ජනාධිපති ට්‍රම්ප් විසින් හඳුන්වන ලදී.

අමාත්‍ය මණ්ඩල රැස්වීමක් අමතමින් මෙම අදහස් ප්‍රකාශ කළ ට්‍රම්ප් ජනාධිපතිවරයා ග්‍රීන් කාඩ් ලොතරැයි පත් ක්‍රමය අවසන් කිරීමේ කටයුතු එදින සිටම පටන් ගන්නා බව පැවැසීය.
ග්‍රීන් කාඩ් ලොතරැයිය හොඳ නැති බව පැවැසූ ජනාධිපති ට්‍රම්ප් 'අපි එයට එරෙහිව සිටියා' යනුවෙන්ද පැවැසීය.

ග්‍රීන් කාඩ් ලොතරැයි ක්‍රමය අවසන් කොට ලකුණු ලබාදෙන ක්‍රමවේදයක් මත (Merit-based Program) සංක්‍රමණිකයන්ට ඇමෙරිකාවට ඇතුළු වීමට ඉඩකඩ ලබාදීමට තම පරිපාලනය කටයුතු යෙදීමට බලාපොරොත්තු වන බවද පැවැසීය.

ට්‍රක් රථ අනතුර මඟින් ත්‍රස්ත ක්‍රියාවක නිරතවූ සැකකරුව කියුබාවේ ගුවන්තනාමෝ බේ (Guantanamo Bay) හි පිහිටි හමුදාවේ රැඳවුම් කඳවුරට යැවීම ගැනද තමා අවධානය යොමු කරන බවද ජනාධිපති ට්‍රම්ප් මෙහිදී පවසා ඇත.

ගුවන්තනාමො කඳවුර කෘෘර වධහිංසාවන්ට සිරකරුවන් බඳුන් කිරීම සම්බන්ධයෙන් අපකීර්තියක් ලැබූ රැඳවීමේ කඳවුරක් වෙයි.

මව්බිම දැන්

තවදුරටත්

අද මව්‍බිමෙන්

තවදුරටත්

අද පුවත්පත

අද කාටූනය

mawbima Cartoon