නායකත්වයෙන් ගියේ නැවත එන්න නෙවෙයි

බංග්ලාදේශය, සිම්බාබ්වේ සමඟින් එළැඹෙන 15දා බංග්ලාදේශයේදී ආරම්භ වන තුන්කොන් එක්දින ක්‍රිකට් තරගාවලියත් ඇතුළුව ලෝක කුසලානය තෙක් සුදු පන්දුවේ තරග රටාව යටතේ එක්දින හා විස්සයි-20 ආකෘති දෙකෙහි නායකත්වය ඇන්ජිලෝ මැතිව්ස්ටත්, ටෙස්ට් නායකත්වය තවදුරටත් දිනේෂ් චන්දිමාල් යටතට පැවරීමටත් ශ්‍රී ලංකා ක්‍රිකට් ආයතනය තීරණය කර තිබේ.

තව දින කිහිපයකින් ආරම්භ වන තුන්කොන් තරගාවලිය සඳහා මේ වනවිට 16 දෙනකුගෙන් සමන්විත ශ්‍රී ලංකා සංචිතයද ප්‍රකාශයට පත්කළ අතර, ෂෙහාන් මධුසංකට නම් කළ ශ්‍රී ලංකා සංචිතය සඳහා පළමුවරට එකතු වීමට අවකාශය සැලසී තිබීමද විශේෂත්වයකි.

මැතිව්ස්ට අමතරව නම් කළ එම සංචිතයට උපුල් තරංග, ධනුෂ්ක ගුණතිලක, කුසල් මෙන්ඩිස්, දිනේෂ් චන්දිමාල්, කුසල් ජනිත්, තිසර පෙරේරා, අසේල ගුණරත්න, නිරෝෂන් දික්වැල්ල, සුරංග ලක්මාල්, නුවන් ප්‍රදීප්, දුෂ්මන්ත චමීර, ෂෙහාන් මධුසංක, අකිල ධනංජය, ලක්‍ෂාන් සඳකැන් හා වනිඳු හසරංග ඇතුළත්ව ඇත.

කෙසේ වෙතත් නම් කළ කණ්ඩායම සම්බන්ධයෙන් හා ඉදිරි වැඩසටහන් සම්බන්ධයෙන් මාධ්‍ය දැනුවත් කිරීමක් ශ්‍රී ලංකා ක්‍රිකට් ආයතන පරිශ්‍රයේදී ඊයේ (09දා) පැවැති අතර, එහිදී අදහස් දැක්වූ ශ්‍රී ලංකා එක්දින හා විස්සයි-20 නායකයා පැවැසුවේ මෙයට පෙර නායකත්වයෙන් ඉල්ලා අස්වුණේ යළිත් නායකත්වයට පත්වීමේ අදහසකින් නොවන නමුත් වර්තමානයේදී කණ්ඩායම පත්ව ඇති තත්ත්වය සිතා බලා මෙම තීරණය ගත් බවය.

"අලුත් නායකයකු ඕන නිසත්, ඒ නායකයාට හැදෙන්න කාලයක් අවශ්‍ය නිසයි මෙයට මාස 4-5කට පෙර මම කණ්ඩායමේ නායකත්වයෙන් ඉවත් වුණේ. එහෙම නායකත්වය අත්හැරියේ ආයේ එන්න බලාගෙන නොවෙයි. ඒත් ඉන්දියාවේ සිට ආවට පස්සේ ක්‍රිකට් සභාපති තිලංග සුමතිපාල, ප්‍රධාන පුහුණුකරු චන්දික හතුරුසිංහ හා තේරීම් කමිටු සභාපති ගේ‍රහැම් ලැබ්රෝයි මහත්වරුන් සියලු දෙනාම මගෙන් ඉල්ලීමක් කළා නායකත්වය යළි භාරගන්න කියලා. මම ඒ සම්බන්ධයෙන් ටික දවසක් කල්පනා කරලා අවුරුදු 10ක් රට වෙනුවෙන් සෙල්ලම් කළ කෙනෙක් හැටියට කණ්ඩායමේ අවශ්‍යතාව රටේ අවශ්‍යතාව කියලා හිතලා යළිත් නායකත්වය භාරගන්න මම තීරණය කළා. අපේ කණ්ඩායමේ ස්ථාවරත්වය ටිකක් බිඳ වැටිලා තියෙනවා. ඒත් ඒ සියලු දේම හදාගෙන ලෝක කුසලානයට සාර්ථකව මුහුණ දෙන්න ඕන. අනෙක හතුරු අයියා ගැන මම දන්නවා, ඔහු යටතේ මම ශ්‍රී ලංකා "ඒ" කණ්ඩායමෙත් හිටියා. අපි දෙන්නම එක හා සමානව නිතරම හිතන්නේ කණ්ඩායම පිළිබඳව විතරයි. ඒකට සමහර අය කැමැති වෙයි. සමහර අකැමැති වේවි.ඒත් මම ඉදිරියේදීත් රට වෙනුවෙන් උපරිම දේ කරනවා" යනුවෙන්ද මැතිව්ස් සඳහන් කළේය.

දිගු කාලීන පියවරක් යටතේ පසුගියදා නම් කළ 23 දෙනාගෙන් සංචිතයට ඇතුළත් නොවූ වනිඳු හසරංග මෙන්ම ෂෙහාන් මධුසංක තුන්කොන් එක්දින තරගාවලිය සඳහා නම් කළේ කුමන පදනමක් යටතේද යන්න විමසීමකදී තේරීම් කමිටු සභාපති ගේ‍රහැම් ලැබ්රෝයි මහතා පැවැසුවේ ජෙෆ්රි වැන්ඩර්සේ මේ වනවිට ආබාධයකට ලක්ව ඇති බැවින් වනිඳු හරසංග නම් කළ බවත්, මධුසංක වඩාත් වේගයෙන් (පැයට කිලෝ මීටර් 136-137ත් අතර) පන්දු යවන බැවින් ප්‍රධාන පුහුණුකරුවාගේ අනුදැනුම මත මධුසංක කණ්ඩායමට එක්කළ බවයි.

නම් කළ ශ්‍රී ලංකා සංචිතයට මැතිව්ස් හා තිසර පෙරේරාට අමතරව වේගපන්දු යවන්නන් සිවු දෙනකු යොදා ගැනීම සම්බන්ධයෙන් අදහස් දැක්වූ ප්‍රධාන පුහුණුකරු චන්දික හතුරුසිංහ මහතා පැවැසුවේ එළැඹෙන ලෝක කුසලාන ක්‍රිකට් තරගාවලිය එංගලන්තයේ පැවැත්වෙන බැවින් එම තරගාවලිය ඉලක්ක කරගෙන මෙවැනි තීරණයක් ගත් බවත්, ෂෙහාන් මධුසංක සංචිතයට එක් කළේ දිගු කාලීන සැලැස්මක් යටතේ බවත්ය.

"අපි ලෝක කුසලානයට යනකොට පන්දු යවන්නන් 7ක්වත් කණ්ඩායමේ සිටිය යුතුයි. ඒ අය අඩුම තරමේ තරග 15ක්වත් ක්‍රීඩා කරලා තියෙන්න ඕන. එහෙම නැති වුණත් අපිත් එක්ක සංචිතයේ ඉඳලා තියෙන්න ඕන. එහෙම කියන්නේ ෂෙහාන් මධුසංක මේ තරගාවලිය ගහනවා කියන එක නෙවෙයි. අපි දකිනවා එයාට ඉදිරියක් තියෙනවා කියලා. මේ නිසයි එයාව අපි සංචිතයට එක් කළේ" යනුවෙන්ද හතුරුසිංහ කීය.

මේ අතර ජාත්‍යන්තර ක්‍රිකට් කමිටුවේ තහනම් උත්තේජක නිවාරණ ආයතනය ශ්‍රී ලංකාව සම්බන්ධයෙන් පරීක්‍ෂණයක් පැවැත්වීම පිළිබඳව අදහස් දැක්වූ ශ්‍රී ලංකා ක්‍රිකට් සභාපති තිලංග සුමතිපාල මහතා පැවැසුවේ, ඒ සඳහා සියලු සහයෝගය තමන් සලසන බවත්, ක්‍රිකට් ආයතනයේ කිසිදු නිලධාරියකු, පුහුණුකරුවකු හෝ කිසිදු ක්‍රීඩකයකු මෙම චෝදනාවට ලක් වී නොමැති බවය. "ප්‍රසිද්ධියේම මේ චෝදනාව නඟලා තියෙන්නේ ශ්‍රී ලංකාව වෙනුවෙන් ක්‍රීඩා කළ පැරණි ක්‍රීඩකයන් පිරිසක්. මම ඔවුන්ට කියන්නේ ආගම අදහන්න කියලා විතරයි" යනුවෙන් සුමතිපාල මහතා පැවැසීය.

මෙම අවස්ථාව සඳහා ප්‍රධාන විධායක නිලධාරී අෑෂ්ලි ද සිල්වා මහතා මෙන්ම ටෙස්ට් කණ්ඩායමේ නායක දිනේෂ් චන්දිමාල්ද එක්ව සිටියහ.