“සිඳූ” ටෙලියේ රාහුල හිමි හොරෙක් වුණු අරුමය

ඉන්දිකව මේ දවස්වල පුංචි තිරයේදී අපිට හමුවෙන්නේ සිඳූ නාට්‍යයෙන්කො හොමද ඒ අවස්ථාව ලැබුණේ?

තිළිණ බොරලැස්ස මහත්තයා, ප්‍රගීත් මානවඩුව මහත්මයා සහ ජානක සිරිවර්ධන මහත්මයාගෙයි සාකච්ඡාවකින් පස්සේ මාව මේ චරිතයට සුදුසුයි කියලා තෝරාගෙන තිබුණා. ඒත් එක්ක තමයි සිඳු ටෙලි නාට්‍යයේ රාහුල හාමුදුරුවන්ගේ චරිතයට මට සම්බන්ධ වෙන්න ලැබුණේ.

කලින් ඉඳන්ම රංගන ක්‍ෂේත්‍රයට සම්බන්ධ වෙලා හිටියත් ඔබ ප්‍රේක්‍ෂකයන් අතරට ගියේ සිඳූ නිසා නේද?

ඔව්, මම 1998 ඉඳලා වෙළෙඳ දැන්වීම්, වේදිකා නාට්‍ය සහ චිත්‍රපටවලට සම්බන්ධ වෙලා හිටියා. ඒත් මාව ඉස්මතු වෙලා පෙනුණේ සිඳූ හරහා තමයි.

ඉන්දික මුලින්ම එන්නේ වේදිකාවට?

ඔව්. මම මුලින්ම සහභාගි වුණේ 21 ශ්‍රී කියන වේදිකා නාට්‍යයට. පස්සේ මම තවත් ගොඩක් රංගන කටයුතුවලට සහභාගි වුණා.

අලුත් වැඩකට සම්බන්ධ වුණා කියලත් ආරංචියි?

කලාභූෂණ ස්ටැන්ලි හෙට්ටිආරච්චි මහත්මයා අධ්‍යක්‍ෂණය කරන කුණ්ඩලකේශී වේදිකා නාට්‍යයට සම්බන්ධ වුණා. ප්‍රධාන කළමනාකරු සහ සම්බන්ධීකරණ නිලධාරි පාලිත බී. රත්නායක, මගේ යාළුවා හරහා තමයි මට එයට සම්බන්ධ වෙන්න ලැබුණේ. ඒ වගේම මට මේ නාට්‍යයේ නිෂ්පාදන කටයුත්තත් කරන්න ලැබුණා.

තව කවුද මේකට සම්බන්ධ වෙන්නේ?

මහින්ද පතිරගේ මහත්මයා, ඉවංකා පීරිස් මහත්මිය, පාලිත බී. රත්නායක සහ මම තමයි ප්‍රධාන චරිතවලට දායක වෙන්නේ. සෙසු චරිතත් එක්ක චරිත 13ක් තියෙනවා. සංගීතමය දායකත්වය කලාභූෂණ විශාරද චන්ද්‍රා අරන්ගල්ල, විදුලි ආලෝකකරණය වසන්ත කුමාරගේ, වේශ නිරූපණය කරන්නේ තාරක අධිකාරි.

රාහුල හාමුදුරුවන්ට පණ පොවපු ඉන්දික දැන් හොරෙක් නේද?

ඔව්. ඇත්තටම මම මේ වේදිකා නාට්‍යයේ හොරෙක්ගේ චරිතයක් තමයි රඟපාන්නේ. මේ චරිතය මගේ රංගන ජීවිතයේ හැරවුම් ලක්‍ෂ්‍යය වෙනවා.

දැන් තිබෙන පසුබිම යටතේ නාට්‍ය කරලා ප්‍රේක්‍ෂකයන් අතරට ගෙනියන්න පුළුවන් කියලා හිතනවද?

දැන් නාට්‍ය පාසල් මට්ටමිනුත් පෙන්වන්න හැකියාව ලැබිලා තියෙනවා. අනික ප්‍රේක්‍ෂකයාගේ ප්‍රශ්නයක් නෙමෙයි මෙතැන තියෙන්නේ. හොඳ නිර්මාණ නැතිකමයි. හොඳ නිර්මාණ කළොත් ප්‍රේක්‍ෂකයන් අතරට ගෙනියන්න පුළුවන්.

පුංචි තිරයේ අධ්‍යක්‍ෂණ කටයුතුවලට අත ගහන්න අදහසක් නැද්ද?

හිතේ නැතිවම නෙමෙයි. ඒක සිහිනයක් විදිහට තියෙනවා. එය අනාගතයේ කරන්න පුළුවන් වෙයි කියලා මම හිතනවා.

ඔබ ඡායාරූප ශිල්පියෙක්. ඒ හැකියාව දැන් යටපත් කරගෙනද?

දැන් රංගන කටයුතුවලට වැඩි ඉඩක් දීලා තියෙනවා. ඒ නිසා ඡායාරූප ශිල්පියාගේ භූමිකාව ටිකක් යටපත් වෙලා.

එතකොට වැඩි බර රංගනයටද?

ඔව්. දැනට එහෙම වෙලා තියෙනවා. මගේ දැඩි ආශාවක් තියෙන්නේ රංගනයට. ඒ නිසා ඒ පැත්තට බර වැඩිවෙලා.

ලක්‍ෂිකා දිව්‍යාංජලී වීරකෝන්