අද කවුරු දිනුවත් ලංකාව ගැන තීරණය සිකුරාදාට

  👤  1420 readers have read this article !
Published by : MB WEB 2018-03-14 09:46:58

2018 නිදහස් කුසලාන විස්සයි-20 ක්‍රිකට් තරගාවලියේ 5 වැනි තරගය ලෙස ඉන්දියාව හා බංග්ලාදේශය අතර තරගය කොළඹ ආර්. ප්‍රේමදාස පිටියේදී අද (14දා) පැවැත්වීමට නියමිතය.

ඉන්දියානුවන් අවසන් වරට සහභාගි වූ තරග දෙකම ජයගෙන ඇති බැවින් ඔවුන් ඉහළ මානසිකත්වයක් ලබා ඇති නමුත් ප්‍රේමදාස පිටියේදී වාර්තා වූ ඉහළම ලකුණු ප්‍රමාණයක් හඹාගොස් ජයග්‍රහණය ලබා ඇති බංග්ලාදේශය පසුවන්නේද ජයග්‍රාහී මානසිකත්වයෙන් වීම අද තරගයේදී සටන්කාමීත්වය විදහා පෑමට කදිම සාක්‍ෂියක් විය හැකිය.
කෙසේ වුවත් මේ වනවිට තරග තුනකට සහභාගි වී තරග දෙකක් ජයගෙන එක් තරගයක් පරාජය වී මුළු ලකුණු 4ක් හිමිකරගෙන සිටින ඉන්දියාව ප්‍රසාද ලකුණු සටහනේ පෙරමුණ ගෙන ඇති අතර, ශුද්ධ ලකුණු වේගය අනුව දෙවැනි තැන පසුවන්නේ ශ්‍රී ලංකා කණ්ඩායමයි.

ඒ අනුව මේ වනවිට ශ්‍රී ලංකා කණ්ඩායම තරග තුනකට සහභාගි වී එක් තරගයක් ජයගෙන තරග දෙකක් පරාජය වී ශූද්ධ ලකුණු වේගය -0.072ක් සහිතව මුළු ලකුණු 2ක් ලබා සිටි අතර, තරග දෙකකට සහභාගි වී එක් තරගයක් ජයගෙන අනෙක් තරගය පරාජය වී මුළු ලකුණු 2ක් හිමිකරගෙන සිටින බංග්ලාදේශ කණ්ඩායම තෙවැනි තැනට පත්ව තිබෙන්නේ ශූද්ධ ලකුණු වේගය -0.231ක් රඳවා ගනිමිනි.

අද (14දා) පැවැත්වෙන ඉන්දීය-බංග්ලාදේශ තරගයෙන් ඉන්දියාව ජයගතහොත් ඔවුන් නිතැතින්ම අවසන් මහා තරගයට සුදුසුකම් ලබන අතර, අවසන් තරගයට පිවිසෙන අනෙක් කණ්ඩායම 16දා පැවැත්වෙන ශ්‍රී ලංකා-බංග්ලාදේශ තරගයෙන් තීරණය වනු ඇත.

යම් හෙයකින් අද පැවැත්වෙන තරගයෙන් බංග්ලාදේශය ජයගතහොත් කණ්ඩායම් දෙකක් (ඉන්දියාව හා බංග්ලාදේශය) මුළු ලකුණු 4ක් බැගින් ලබා ගන්නා අතර, 16දා පැවැත්වෙන තරගයෙන් ශ්‍රී ලංකාව ජයගතහොත් කණ්ඩායම් තුනම මුළු ලකුණු 4 බැගින් ලබා ගැනීම හේතුවෙන් ශූද්ධ ලකුණු වේගය අනුව ඉදිරියෙන් සිටින කණ්ඩායම් දෙක අවසන් මහා තරගයට සුදුසුකම් ලබා ගැනීමට නියමිතය.

මේ අතර යම් හෙයකින් අද (14දා) පැවැත්වෙන ඉන්දීය-බංග්ලාදේශ තරගය පැවැත්වීමට නොහැකි වුවහොත් ඉන්දියාව නිතැතින්ම අවසන් මහා තරගයට සුදුසුකම් ලැබීමට හැකි වන්නේ ඔවුන් මුළු ලකුණු 5ක් ලබාගත් බැවිනි. (බංග්ලාදේශය මුළු ලකුණු 3යි) එසේ වුවහොත් අවසන් මහා තරගයට සුදුසුකම් ලබාගන්නා අනෙක් කණ්ඩායම 16දා පැවැත්වෙන තරගයෙන් තීරණය වීමට නියමිතව තිබේ.

තවද අද තරගයද පැවැත්වීමට නොහැකිව 16දා පැවැත්වෙන ශ්‍රී ලංකා-බංග්ලාදේශ තරගයද පැවැත්වීමට නොහැකි වුවහොත් කණ්ඩායම් දෙකටම එක ලකුණ බැගින් හිමිවන නමුත් බංග්ලාදේශ කණ්ඩායම ලකුණු 4ක් ලබා අවසන් මහා තරගයට සුදුසුකම් ලබන්නේ ඔවුන් ඒ වනවිටත් ලකුණු 3ක් ගෙන සිටි බැවිනි. එවිට ශ්‍රී ලංකාවට හිමිවන්නේ ලකුණු 3කි.

මව්බිම දැන්

තවදුරටත්

අද මව්‍බිමෙන්

තවදුරටත්

අද පුවත්පත

අද කාටූනය

mawbima Cartoon