ලොව ලොකුම ස්ට්‍රෝබෙරි පීසාව නුවරඑළියේදී හැදෙයි පීසාවේ බර කිලෝ 1,400යි

නෝර්වුඩ් - නීටා පත්ම කුමාරි

නුවරඑළිය ග්‍රෑන්ඩ් හෝටලයේ ප්‍රධාන සූපවේදීන් ඇතුළු සේවක මණ්ඩලය එක්ව ලෝකයේ ලොකුම අතුරුපස පීසාව නිපදවා එය පිළිගැන්වීම ඉකුත්දා එම හෝටලයේදී සිදු කෙරිණි.

මෙම ස්ට්‍රෝබෙරි අතුරුපස පීසාව සඳහා ස්ට්‍රෝබෙරි කිලෝග්‍රෑම් 200ක් උපයෝගී කරගෙන තිබූ අතර එය නිපදවීම සඳහා උපයෝගී කරගත් අනෙකුත් ද්‍රව්‍ය සමඟ මුළු පීසාවේ බර කිලෝ 1400කි.

මෙම ස්ට්‍රෝබෙරි පීසාව හයදහසකට අනුභව කළ හැකි බව එය නිපදවූ සූපවේදීහු පැවැසූහ.

පීසාවේ විශ්කම්භය අඩි 25ක් සහ උස අඟල් 6කින් යුක්ත විය. නුවරඑළිය ග්‍රෑන්ඩ් හෝටලේ ප්‍රධාන සූපවේදීන් වන ප්‍රියන්ත වීරසිංහ සහ විරාජ් ජයරත්න යන මහත්වරුන් සහ එහි සේවකයන් 100 දෙනකුගේ සහභාගිත්වයෙන් මෙම ස්ට්‍රෝබෙරි පීසාව නිෂ්පාදනය කර ඇත.

පීසාව එළිදැක්වීමේ අවස්ථාවට සංචාරක මණ්ඩලයේ සභාපති කාවන් රත්නායක, නුවරඑළිය මහ නගර සභාවේ සභාපති චන්දන ලාල් කරුණාරත්න යන මහත්වරු සහභාගි වූහ.

නුවරඑළිය ග්‍රෑන්ඩ් හෝටලයේ සාමාන්‍යාධිකාරී රිසාන් රසීම් මහතාගේ උපදෙස් මත මෙම පීසාව නිර්මාණය කර ඇත. නුවරඑළියේ පමණක් වැවෙන ස්ට්‍රෝබෙරි වගාව ලොව පුරා ප්‍රචලිත කිරීමේ අරමුණින් සහ නුවරඑළිය ප්‍රදේශයේ ස්ට්‍රෝබෙරි වගාකරුවන් දිරිගැන්වීම මෙම පීසාව නිර්මාණය කිරීම තුළින් අවස්ථාව ලැබෙන බව නුවරඑළිය මහ නගර සභාවේ සභාපති චන්දන ලාල් කරුණාරත්න මහතා කීය.