රජරට මහ වැව්වලින් මසකට අඩියක් ජලය වාෂ්ප වෙනවා

මිහින්තලේ - ර.මු.සු. රත්නායක

අනුරාධපුර දිස්ත්‍රික්කයේ මහ වැව්වල පවතින ජල මට්ටම වාෂ්පීකරණය හා කාන්දු වීම නිසා ශීඝ්‍රයෙන් පහළ යමින් පවතින බවත් එම ප්‍රමාණය මසකට අඩි එකක් පමණ බවත් අනුරාධපුර කලාප වාරිමාර්ග අධ්‍යක්ෂ එම්.ඩබ්ලිව්.පී. ද සිල්වා මහතා පැවැසීය. අනුරාධපුර දිස්ත්‍රික් ලේකම් දිසාපති ආර්.එම්. වන්නිනායක මහතාගේ ප්‍රධානත්වයෙන් 18දා දිස්ත්‍රික් ලේකම් කාර්යාල ශ්‍රවණාගාරයේ පැවැති දිස්ත්‍රික් කෘෂිකර්ම කමිටු රැස්වීමේදී කලාප වාරිමාර්ග අධ්‍යක්ෂවරයා එසේ කීය.

වැඩිදුරටත් අදහස් දක්වමින් අධ්‍යක්ෂවරයා අනුරාධපුර දිස්ත්‍රික්කයේ මහ වැව් 13ක දැනට පවතින ජල මට්ටම් මෙසේ ඉදිරිපත් කරන ලදී.

නුවර වැව ජල ප්‍රමාණය 13%යි, තිසාවැව 15%යි, අභය වැව 4%යි, මහකනදරා වැව 15%යි, මහවිලච්චිය 27%යි, නාච්චාදුව 25%යි, අංගමුව 9%, හුරුළු වැව 29%යි, මානන්කට්ටිය 12%යි, පදවිය 6%යි, වාහල්කඩ 3%යි. 50% ඉක්මවා ජලය ඇත්තේ මහ වැව් දෙකක පමණි.

රාජාංගණය 63%ක් සහ කුරුවිල 63.7%ක් වශයෙනි. මහවැලි කලාපයට ජලය සපයන කලාවැවේ දැනට පවතින්නේ 40%ක ජල ප්‍රමාණයක් බව කලා වැව මහවැලි තාක්ෂණ ඉන්ජිනේරු ප්‍රේමලාල් මහතා "මව්බිම"ට සඳහන් කරන ලදී. නුවර වැව සහ නාච්චාදුව, කුරුවිල යන ජලාශවලට යල කන්නයේ වගාව රැක ගැනීමට හා පානීය ජලය ලබාදීම සඳහා මහවැලියෙන් අතිරේක ජල ප්‍රමාණයක් ලැබී ඇතැයිද අනුරාධපුර කලාප වාරිමාර්ග අධ්‍යක්ෂවරයා වැඩිදුරටත් හෙළි කරන ලදී.