අවුරුදු 30කට පසු හෙළිවන රහස

  👤  4485 readers have read this article !
2018-06-03

මහ බැංකු බැඳුම්කර වංචාව පිළිබඳ මාතෘකාව නැවත කරළියට පැමිණ තිබේ. මෙවර ඊට මුල් වූයේ දයාසිරි ජයසේකර මන්ත්‍රිවරයාට පර්පචුවල් ට්‍රෙෂරීස් සමාගමේ අර්ජුන්ලාගෙන් ලක්ෂ 10ක චෙක්පතක් ලැබුණු බව ප්‍රසිද්ධියට පත්වීමෙනි. එම චෙක්පත දයාසිරි මන්ත්‍රිවරයාගේ ආරක්ෂක නිලධාරියකු විසින් මාරු කරගෙනද තිබුණේය.

ප්‍රශ්නය මතුවූවිට මන්ත්‍රිවරයා එය පිළිගත්තේය. මැතිවරණ කටයුතු සඳහා අදාළ චෙක්පත ලැබුණේ කාගෙන්ද යන බවවත් මතක නැති බව දයාසිරි ප්‍රකාශ කළේය. එතෙකින් නිහඬ නොවූ හෙතෙම තවත් ප්‍රකාශයක් කරමින් පැවැසුවේ පාර්ලිමේන්තුවේ මන්ත්‍රිවරුන් 118 දෙනකුට පර්පචුවල් ට්‍රෙෂරීස් සමාගමෙන් මුදල් ලැබුණු බවය. එම 118 දෙනා පිළිබඳ සියලු විස්තර ජනාධිපති විමර්ශන කොමිෂන් සභා වාර්තාවලට ඇතුළත්ව තිබෙන බවය.
මෙයට පෙර දයාසිරි මන්ත්‍රිවරයාගේ නම ඇඳූණේ බැඳුම්කර වංචාව සම්බන්ධව කෝප් කමිටුවේ පරීක්ෂණ සිදුවෙද්දී අර්ජුන් ඇලෝසියස්ගෙන් ඔහුට දුරකථන ඇමතුම් දෙකක් ලැබුණු බව හෙළිවීමෙනි. මන්ත්‍රිවරයා එය සත්‍ය බව පිළිගෙන ඒ සම්බන්ධව පැහැදිලි කිරීමක්ද කළේය. කෝප් කමිටු වාර්තාවට පාද සටහන් යෙදූ ෆුට් නෝට් කල්ලිය ගැන එකල මහත් ආන්දෝලනයක් ඇතිවිය.

ෆුට් නෝට් කල්ලිය විසින් අර්ජුන්ලාගෙන් කෝටි ගණන් අල්ලස් ගෙන ඇතැයි පාර්ලිමේන්තුවේදිත් ඝෝෂා කළහ. අල්ලස් ගෙන තිබෙන්නේ කුඩා කල්ලියක් නොව මන්ත්‍රිවරුන් 118ක් යැයි හෙළිවූ විට ජනතාවගේ පැත්තෙන්ද එතරම් හඬක් මතුවන බව නොපෙනේ. ලංකාවේ හැටි එහෙමය. අපේ කට්ටියත් අල්ලස් ගෙන තිබෙනවා නම් නිහඬ වීම හොඳයැයි බොහෝ දෙනා සිතන බව පෙනේ.

මේ සියල්ලෙන්ම පෙනී යන්නේ අල්ලස දූෂණය ප්‍රජාතන්ත්‍රවාදයේ මහ දෙවොලද ගිලගෙන ඇති බවය. මොකාගෙන් වුණත් කමක් නැහැ දෙනවා නම් ගත්තාම ඇති වරද කුමක්දැයි දූෂිත මන්ත්‍රිවරුන් 118ටම සිතනවා විය හැකිය. එයින් පෙනී යන්නේ බැඳුම්කර මංකොල්ලය හිතුවාටත් වඩා වැඩි පිරිසකගේ දායකත්වයෙන් සිදුවූවක් බවය.
මේ දූෂිතයන් කවුද ඔවුන්ගේ තරාතිරම කුමක්ද යන්න ජනතාව දැනගත යුතුය. එය ජනතාව සතු යුක්ති සහගත අයිතියකි. එහෙත් දැනට හෙළිවන අන්දමට 118 පිළිබඳ විස්තර දයාසිරි මන්ත්‍රිවරයා විසින් ජනාධිපති ලේකම්ගෙන් ඉල්ලූවිට ඔහු කියා තිබෙන්නේ ජනාධිපති විමර්ශන කොමිසමේ වාර්තා ලේඛනාරක්ෂක දෙපාර්තමේන්තුවට භාර දුන් බවය.

ලේඛනාරක්ෂක දෙපාර්තමේන්තුව කියන්නේ තමන් සතුව ඇති කොමිෂන් වාර්තා වසර 30ක් කල් ඉකුත්වන තුරු එළියට දීමට නීතියෙන් ඉඩ නැති බවය. මුදල් ගත් 118 ලැයිස්තුව ඒ අනුව දැන් ඇත්තේ හුඹස් කටේය.

යහපාලනය ජනතාවට ලබාදුන් ඉහළම ආශීර්වාදය තොරතුරු දැනගැනීමේ අයිතිය යැයි පසුගිය දිනවල උඩ පැන්න උදවිය මේ ගැන කියන්නේ කුමක්දැයි දැන ගැනීමට අපි ආසාවෙන් සිටිමු. යහපාලනයේ වැදගත්ම සංචරකයක් වන විනිවිදභාවයට (ඊපචදඵනචපඥදජර) එතැනින් විලංගු වැටී තිබේ. තොරතුරු දැනගැනීමේ අයිතිය පුරවැසි ජයග්‍රහණයක් බවත්, ලංකාවේ තොරතුරු දැනගැනීමේ පනත ආසියාවේ හොඳම පනත බවත් ප්‍රකාශ කළ මහත්වරු මේ ගැන මොනවා කියනවා දැයි නොදනිමු. ආණ්ඩුව තොරතුරු හංගනවා නම් පුරවැසියාට කරන්නට තිබෙන්නේ පනතේ 34 (1) උප වගන්තියට අනුව අභියාචනාධිකරණයට අභියාචනයක් ඉදිරිපත් කිරීමය.

මව්බිම දැන්

තවදුරටත්

අද මව්‍බිමෙන්

තවදුරටත්

අද පුවත්පත

අද කාටූනය

mawbima Cartoon