සක්විතිලා සහ මංගලලා

'සක්විති' මොඩලයේ ඊනියා මූල්‍ය ආයතන මට්ටු කිරීමට ඇමැති මංගල කෙවිට අතට ගෙන ඇත. ගිනි පොලී අය කරන ක්ෂුද්‍ර මූල්‍ය ආයතන හතු පිපෙන්නා සේ පිහිටුවීම වැළැක්වීමේ අරමුණින් නියාමන ආයතනයක් ආරම්භ කරන බව ඇමැතිවරයා ප්‍රකාශ කර තිබේ. මේ යටතේ දැඩි නීතිරීති පැනවීමටත්, අධීක්‍ෂණය කිරීමටත් වැඩි අවස්ථාවක් ලැබෙයි.

වසරකට සියයට 200ත් සියයට 220ත් අතර අධික ගිනි පොලී අය කරමින් දුප්පත් ජනතාව විශේෂයෙන් ග්‍රාමීය කාන්තාවන් ණය උගුලේ සිර කිරීමට ඇතැම් ක්ෂුද්‍ර මූල්‍ය ආයතන කටයුතු කර ඇත. ආර්ථික ප්‍රශ්නවලින් බේරීමට ණය ලබා ගත්තද ඔවුන් බොහෝ දෙනකු මේ මූල්‍ය ආයතන නිසා වැටී ඇත්තේ කබලෙන් ළිපටය.

ක්ෂුද්‍ර මූල්‍ය ආයතන රටපුරා බිහි වන්නේ අවිධිමත් ණය වෙළෙඳපොළක් තුළින් සිය මූල්‍ය අවශ්‍යතා ඉටු කර ගැනීමට ඉදිරිපත් වන ග්‍රාමීය අඩු ආදායම්ලාභී ගනුදෙනුකරුවන් ඉලක්ක කරගෙනය. විධිමත් මූල්‍ය ආයතනවලින් සිය ණය අවශ්‍යතා සපුරා ගන්නට නොහැකි වීම නිසා මේ බොහෝ දෙනා අවිධිමත් ක්ෂුද්‍ර මූල්‍ය ආයතන සමඟ ගනුදෙනු කිරීමට පෙලඹෙති.

ග්‍රාමීය ජනතාවගේ මූල්‍ය අවශ්‍යතා යැයි පවසමින් පසුගිය කාලයේ ඇරැඹූ බොහෝ රාජ්‍ය මූල්‍ය ආයතන අවසානයේ මේ ග්‍රාමීය ජනතාවට ගනුදෙනු කළ නොහැකි කොන්දේසි පැනවූ තවත් එක් බැංකුවක් බවට පත්වී තිබේ. කාලයකට පෙර ඇරැඹුණු ග්‍රාමීය සමුපකාර බැංකු පවා කෙමෙන් සාම්ප්‍රදායික වාණිජ බැංකුවල වෙස් ගෙන ඇත. සමෘද්ධි බැංකුද වැල්පොලී අය කරමින් දුප්පත් ජනතාව ණය උගුලක සිර කරමින් සිටී. එවැනි පසුබිමක ග්‍රාමීය දුප්පත් ජනතාව ක්ෂුද්‍ර මූල්‍ය වෙස් ගත් සක්විත්තන්ට රැවටීම පුදුමයක් නොවේ.

මේ තත්ත්වයට විසඳුම නම් සමුපකාර ග්‍රාමීය බැංකු ඇතුළු එවැනි අරමුණුවලින් ඇරැඹුණු මූල්‍ය ආයතන වඩ වඩාත් ග්‍රාමීය ජනතාවට සමීප කිරීමයි. අවම කොන්දේසි හා අවම පොලී මත ණය ලබාදීමට ඉදිරිපත්වීම තුළින් මේ ගනුදෙනුව ඇරැඹිය හැකිය. අලුතෙන් මූල්‍ය හා ක්ෂුද්‍ර මූල්‍ය ආයතන බිහි කිරීමේ අවශ්‍යතාවක් නැත. රාජ්‍ය, සමුපකාර හා පෞද්ගලික මූල්‍ය හා ක්ෂුද්‍ර මූල්‍ය ආයතන අධීක්‍ෂණයට හා නියාමනයට යටත් කිරීම අත්‍යවශ්‍යය. නීතිරීති දැඩි කළ යුතු අතර ගනුදෙනුකරුවන් හා ආයතන අතර පවතින කොන්දේසි ලිහිල් කළ යුතුය.

ශ්‍රී ලංකා මහ බැංකුවේ බැංකු නොවන මූල්‍ය ආයතන අධීක්‍ෂණ

දෙපාර්තමේන්තුවේ සහ ක්ෂුද්‍ර මූල්‍ය ආයතන එකමුතුවෙන් නියාමන ආයතනයක් පිහිටුවීම යෝග්‍යය. මෙහිදී ක්ෂුද්‍ර මූල්‍ය ආයතනද ආරක්‍ෂා කරගත යුතුය. අදාළ ආයතනවල විශාල පිරිසක් සේවය කරන අතර ඉතා යහපත් ආකාරයෙන් පවත්වා ගෙන යන ආයතන රැසක්ද ඒ අතර වේ.

ක්ෂුද්‍ර මූල්‍ය ආයතනවලින් ලබා ගෙන ඇති රුපියල් ලක්‍ෂයකට අඩු ණය කපා හැරීමට රජය තීරණයක් ගැනීම මහත් දුෂ්කරතාවට පත්ව සිටින පාරිභෝගික ජනතාවට මහත් සහනයකි. එහෙත් අදාළ පියවර ගත යුත්තේ ක්ෂුද්‍ර මූල්‍ය ආයතන කඩා වැටීමකට ලක් කර නොගෙනය. සක්විති මොඩලයේ ඊනියා ආයතනවලට නම් කිසිදු බුරුලක් දිය යුතු නැත.
සියයට 200 සියයට 220 තරම් අධික පොලී අය කිරීම වෙනුවට උපරිමයෙන් සියයට 35ක් හෝ ඊට අඩු පොලී අනුපාතයකට ණය මුදල් ඉදිරියේදී ලබාදීමට ක්ෂුද්‍ර මූල්‍ය ආයතන මුදල් අමාත්‍යාංශයට එකඟතාව පළකොට ඇත. එය සතුටට කරුණකි. සාකච්ඡාවෙන් සම්මන්ත්‍රණයෙන් ප්‍රශ්න විස¼දා ගැනීම ඉතාමත් වටී.

ප්‍රමුඛ, සෙලාන්, ගෝල්ඩන් කී, ඊ.ටී.අයි. වැනි ප්‍රකට බැංකු හා මූල්‍ය ආයතන නිසා මෙරට පාරිභෝගික ජනතාවගෙන් සැලකිය යුතු පිරිසක් මුහුණ දුන් හා මුහුණ දී ඇති අර්බුදය සුළුපටු නැත. සක්විති, දඬුවම් වැනි ක්ෂුද්‍ර මූල්‍ය ආයතන ලෙස පෙනී සිටි තක්කඩියන්ට හසුවූ පිරිස පත්වූ දුෂ්කරතාව අතිමහත්ය. එවැනි ඉතිහාසයක් තිබෙන රටක ඇමැති මංගල සමරවීර 'ක්ෂුද්‍ර මූල්‍ය ආයතන නියාමනයට ආයතනයක් පිහිටුවාලීමට පියවර ගැනීම පමා වුවද ගත් සබුද්ධික තීරණයකි.