මහජනතාව හා රජයේ නිලධාරීන්

  👤  3552 readers have read this article !
2018-08-30

ඕනෑම රටක ආණ්ඩුවක වැදගත්ම පිරිස විෂයභාර ඇමැතිවරුන්ය. අමාත්‍යාංශ ලේකම්වරු නැත්නම් මේ ඇමැතිවරුන්ට වැඩ කළ නොහැකිය. ලේකම්වරුන්ට සිය නිලධාරීන්ගේ සහාය උපරිමාකාරයෙන් නොලැබෙන්නේ නම් අමාත්‍යාංශවලින් මහජනතාවට සෙත සැලසෙන්නේ නැත. මහජන ඉල්ලීම් සහ දුක්ගැනවිලි සඳහා ප්‍රමුඛත්වයක් ලබාදීමට සෑම බදාදා දිනකම මේ නිලධාරීන් අනිවාර්යයෙන්ම අමාත්‍යාංශයේ රැඳී සිටිය යුතු බවට ජනාධිපතිවරයා අමාත්‍යාංශ ලේකම්වරුන්ට උපදෙස් දී ඇත්තේ ඒ නිසාය.

ජනාධිපතිවරයාට මෙලෙස විශේෂයෙන් උපදෙස් දීමට සිදුව ඇත්තේ ඇතැම් නිලධාරීන් එදින අමාත්‍යාංශයේ රැඳී නොසිටින නිසා බව පැහැදිලිය. මහජන දිනයට නිලධාරීන් තබා ඇමැතිවරුන්, නියෝජ්‍ය ඇමැතිවරුන් පූර්ණ කාලය මහජනතාව වෙනුවෙන් කැප කරනවාද යන්න සැක සහිතය.

ඇමැතිවරුන්, නිලධාරීන්ගේ රාජකාරිය ගැන සොයා බලනවා නම් කිසිවකු අනවශ්‍ය ලෙස හැසිරෙන්නේ නැත.

ඇත්ත වශයෙන්ම රාජ්‍ය යාන්ත්‍රණයම ඇත්තේ මලකඩ කා අබල දුබලවය. සම්පූර්ණ ප්‍රතිසංස්කරණයක් අවශ්‍ය වී තිබියදී පැලැස්තර ඇලවීමෙන් රාජ්‍ය යාන්ත්‍රණය ගොඩගත නොහැකිය. ඒ පිළිබඳ පුළුල් දැක්මක් ආණ්ඩුව සතු විය යුතුය. එහෙත් එවැන්නක් රාජපක්ෂ ආණ්ඩුවට තිබුණේ නැත. මෛත්‍රි-රනිල් ආණ්ඩුවට ඇති බවක්ද නොපෙනේ.

කෙසේ වුවද සෑම අමාත්‍යාංශයක්ම වෙබ් අඩවියක් පවත්වාගෙන යමින් අමාත්‍යාංශයේ කාර්යභාරය, ක්‍රියාත්මක සංවර්ධන ව්‍යාපෘති සහ ප්‍රගතිය පිළිබඳ තොරතුරු යාවත්කාලීන කරමින් මහජනතාව දැනුවත් කිරීමේ වටිනාකම ජනාධිපතිවරයා අවධාරණය කර තිබීම වැදගත්ය. ඇතැම් රාජ්‍ය ආයතන සිය වෙබ් අඩවි මාස ගණනකින් යාවත්කාලීන කර නැති බව ඒවාට පිවිසීමේදී දැකගත හැකිය.

අමාත්‍යාංශ හා අදාළ අමාත්‍යාංශ යටතේ ඇති ආයතනවල මාධ්‍ය ප්‍රධානීන් යටතේ මාධ්‍ය අංශ පිහිටුවාගෙන තිබුණද ඔවුන් කුමක් කරනවාද යන්න විටෙක ප්‍රශ්නාර්ථයකි.

දේශපාලනඥයන්ට එනම්, ඇමැතිවරුන්ට වඩා මහජනතාවගේ මුදල් පිළිබඳ වගකීම පැවරී ඇත්තේ රජයේ නිලධාරීන්ටය. ඇමැතිවරු කුමක් යෝජනා කළත් අදාළ නීති රෙගුලාසිවලට අනුව වැඩ කිරීමට නිලධාරීන් බැඳී සිටින්නේ එනිසාය. එහෙත් අමාත්‍යාංශ ලේකම්වරු, ඇතුළු ඉහළ නිලධාරීන් පත්කිරීමේදී 'දේශපාලනය' මැදිහත් කිරීම නිසා පරිපාලන සේවය පිරිහී ගියේය. 70 සමඟි පෙරමුණු ආණ්ඩුව කළ වරද 80 දශකයේදී රාජ්‍ය සේවය ඉතා පහත් අඩියකට වැටීමට හේතු විය. වර්තමානය වන විට තත්ත්වය අතිශය කනගාටුදායකය. මැති ඇමැතිවරුන්ගේ හොර වංචා දූෂණවලට උඩගෙඩි දුන් රජයේ උසස් නිලධාරීන් පිරිස් තමන්ට දඬුවම් නොදෙන ලෙස ආණ්ඩුවට තර්ජනය කිරීමට තරම් ශක්තිමත්ව තිබීමෙන් එය සනාථ වේ.

ජනාධිපතිවරයා උත්සාහ කරන්නේ රජයේ සේවය විශේෂයෙන් අමාත්‍යාංශවල කටයුතු විධිමත් කිරීමටය. එහෙත් ඇමැතිවරුන්ට හා නිලධාරීන්ට ඊට වුවමනාවක් නැතිනම් ජනාධිපතිවරයා අපේක්ෂා කරන කිසිවක් සිදුවන්නේ නැත. ජනතාවට සහන සලසා රට පෙරට රැගෙන යෑම වෙනුවට ඇතැමුන් කරන්නේ සියලු වරප්‍රසාද ලබාගනිමින් 'පුටු' රත් කිරීම පමණි.

ජනාධිපතිවරයා පවතින තත්ත්වය අවබෝධ කරගෙන ඇති බව පෙනේ. එහෙත් අමාත්‍යාංශවල ලේකම්වරුන් හා නිලධාරීන් නිසියාකාරව මෙහෙයවා ගනිමින් ආණ්ඩුව පෙරට රැගෙන යෑම එතරම් පහසු කටයුත්තක් නොවන බව නම් පැහැදිලිය.

මව්බිම දැන්

තවදුරටත්

අද මව්‍බිමෙන්

තවදුරටත්

අද පුවත්පත

අද කාටූනය

mawbima Cartoon