අපි දෙන්නා එක්වීලා සහයෝගෙන් වැඩේ දෙන්නේ

මේ ඉන්නේ මෙරට දේශපාලනයේ යුගයක් නියෝජනය කළ දැවැන්ත පුරුෂයන් දෙදෙනෙකි. එක් අයෙක් ඩඩ්ලි ෂෙල්ටන් සේනානායක වන අතර අනෙක් තැනැත්තා ජූනියස් රිචට් ජයවර්ධනය. ඩඩ්ලි මීරිගම බෝතලේ වලව්වෙන් දේශපාලනයට පැමිණි අතර ජේ.ආර්. දේශපාලනයට ආවේ කොළඹ 07 වෛජයන්ති ප්‍රාසාදයෙනි. ඩඩ්ලිගේ පියා ශ්‍රී ලංකාවේ ප්‍රථම අග්‍රාමාත්‍ය ඩී.එස්. සේනානායක වන අතර ජේ.ආර්.ගේ පියා ඉයුජින් විල්ෆ්‍රඩ් ජයවර්ධන නම් ප්‍රකට විනිසුරුවරයාය.

ඩඩ්ලි බි්‍රතාන්‍යයේ කේම්බි්‍රජ් විශ්වවිද්‍යාලයේ අධ්‍යාපනය ලැබූ අතර ජේ.ආර්. රාජකීය විද්‍යාලයේ සහ කොළඹ විශ්වවිද්‍යාලයේ අධ්‍යාපනය ලැබීය. දෙදෙනාගෙන් වැඩි මහලු තැනැත්තා ජේ.ආර්ය. ඔහු උපන්නේ 1906 සැප්තැම්බර් 17 දිනය. ඩඩ්ලි උපන්නේ 1911 ජුනි 19 වැනි දිනය. එහෙත් මේ දෙදෙනාගෙන් බාලයා වූ ඩඩ්ලි ජේ.ආර්.ට පෙර අගමැති කඩුල්ල පැන ගත්තේය. එයට හේතු වූයේ ඩඩ්ලි සේනානායකගේ පියා ඩී.එස්.ගේ හදිසි අභාවයෙන් පසු රාජකීය ඔටුන්න ඩඩ්ලිගේ ඔළුවට පහත්වීමය. ජේ.ආර්. රාජ්‍ය මන්ත්‍රණ සභාවේ සිටි පැරැන්නා මෙන්ම එක්සත් ජාතික පක්‍ෂයේ සිටි ජේ‍යෂ්ඨතම ඇමැතිවරයා වුවද අගමැති පුටුව ඔහුට අහිමි විය. 1952 ඩී.එස්.ගේ හදිසි අභාවයෙන් පසු ඔහුගේ අන්තිම කැමැත්ත යැයි පවසමින් අග්‍රාණ්ඩුකාර සෝල්බරි සාමි අගමැති ධුරය ඩඩ්ලිට පැවැරුවේය.

මේ ප්‍රශ්නයෙන් එජාපයේ ප්‍රබලයන් වූ තිදෙනෙකු හෙල්ලුම් කෑවේය. ඔවුන් නම් ආණ්ඩුවේ සභානායක එස්.ඩබ්ලිව්.ආර්.ඩී. බණ්ඩාරනායක, රජයේ වැඩ ඇමැති සර් ජෝන් කොතලාවල සහ මුදල් ඇමැති ජේ.ආර්. ජයවර්ධනය. තවදුරටත් බලා සිටීමේ තේරුමක් නැති බව වටහා ගත් බණ්ඩාරනායක ආණ්ඩුවෙන් ඉවත්ව විපක්‍ෂයේ අසුන් ගත්තේය. සර් ජෝන් ඔරොප්පුවී එංගලන්තයට ගියේය. ජේ.ආර්. සිදුවන්නේ කුමක්දැයි ඉවසිල්ලෙන් බලා සිටියේය. දවසක් දෙකක් නොව අවුරුදු 25ක්ම බලා සිටියේය. ඒ කාලය තුළ තවත් අවස්ථා හතරකදී ඩඩ්ලි අගමැති පුටුවේ වාඩි විය.

ඡායාරූපයේ හැටියට නම් පෙනෙන්නේ දෙදෙනා සහයෝගයෙන් වැඩේ දෙන්නට හැටට හැටේ යන බවය. නමුත් ජේ.ආර්.ගේ සිනාවත ඩඩ්ලිගේ මුහුණේ නොපෙනේ. ජේ.ආර්. ජයවර්ධන - ඩඩ්ලි සේනානායක දෙදෙනා එකට සිටියත් දෙදෙනා අතර නොහොඳ නෝක්කාඩු දිගටම තිබිණි. එය අළු යට ගිනි මෙන් කිසි විට එළියට නොආවේය.

දේශපාලන විචාරකයන් එය හැඳින්වූයේ ජේ.ආර්. - ඩඩ්ලි සීතල යුද්ධය වශයෙනි.

කෙතරම් අමනාපකම් මැද නමුත් ජේ.ආර්. හැම විටම ආණ්ඩුව ගෙන යෑමට අගමැති ඩඩ්ලිට උපරිම සහාය පළ කළේය. වර්තමාන දේශපාලනයේ පවතින ඇන කොටා කා ගැනීම් එදා තිබුණේ නැත.

තිබුණේ නම් ඒ අදට වඩා බෙහෙවින් මටසිලිටි ආකාරයටය. ආණ්ඩුවට විරෝධය පළ කර ලන්ඩන් ගිය කොතලාවල නැවත පැමිණ ඩඩ්ලිගේ ආණ්ඩුවේ ඇමැතිකමක් ගත්තේය. ජේ.ආර්. ශ්‍රී ල.නි.පයට ඔන්න යනවා මෙන්න යනවා යැයි පත්තරවල කාටූන් ඇන්දත් ජේ.ආර්. එජාපය හැර ගියේ නැත.

තම මතය හෙළිවන අයුරු මාධ්‍යයට කට ඇරියේ නැත. ජේ.ආර්. එජාප නායකත්වයට පත්වූයේ 1973 අප්‍රේල් 13 වැනිදා සිදුවූ ඩඩ්ලිගේ අභාවයෙන් පසුවය. ඩඩ්ලි මිය යන තෙක්ම විපක්‍ෂ නායක ධුරයේ කටයුතු කළේය. මේ දෙදෙනා අතර කල්‍යාණ මිත්‍රකමක් නොවේ නම් අඹයාළු කමක් තිබුණා යැයි කිසිවකු කියන්නේ නැත. ඩඩ්ලි සේනානායකගේ අභාවය පිළිබඳ ජේ.ආර්. ජයවර්ධන සතුටට පත්වී යැයි සඳහන් කිරීම සාහසිකය. නමුත් අවමඟුල් උළෙල දා ජේ.ආර්. කළ කතාව ශෝකය පළ කිරීමක් නොවීය. ජයවර්ධන මහතා එම කතාව අවසන් කළේ 'කුමරුනි, ඔබට සුබ රාත්‍රියක්' යනුවෙන් ප්‍රකාශ කරමිනි.

උදේනි සමන් කුමාර