මන්ත්‍රිවරුන් 13ක් පාර්ලිමේන්තු සෝපානයේ විනාඩි 20ක් හිරවෙලා

  👤  2365 readers have read this article !
2019-02-08

ජේ.ටී. ද සිල්වා, රුචිර දිලාන් මධුශංක

පාර්ලිමේන්තුවේ පහසුකම් සලසන ගෘහ කාරක සභාවේ සභාපති, සංචාරක ඇමැති රංජිත් අලුවිහාරේ සහ විපක්‍ෂයේ මන්ත්‍රිවරුන් 13 දෙනකු ඊයේ (7දා) විදුලි සෝපානයක හිරවී කිසිදු පිළිසරණක් නොමැතිව විනාඩි විස්සකට ආසන්න කාලයක් සිටීමට සිදුවිය.

මන්ත්‍රිවරු 13 දෙනකු මෙසේ විදුලි සෝපානය තුළ හිරවී සිටියදී හදිසි ඇමතුම් ලබා ගැනීම සඳහා ඒ තුළ සවිකර තිබූ දුරකථනයට, නිලධාරියකු සම්බන්ධ කර ගැනීමට නොහැකිවූ නිසා මන්ත්‍රිවරු දැඩි අපහසුතාවකට මුහුණපෑ බව වාර්තා වේ.

සිද්ධියට මුහුණපෑ මන්ත්‍රි කණ්ඩායම, මන්ත්‍රි භෝජනාගාරයේ සිට සභා ගර්භයට යෑම සඳහා පළමු මහලේ මන්ත්‍රිවරුන් සඳහා වෙන්කර ඇති සෝපානයට ඇතුළුවී දෙවැනි මහල දක්වා ගමන් කරන අතරතුර මෙම සිද්ධියට මුහුණපා ඇත.

විනාඩි විස්සකට ආසන්න කාලයක් සෝපානය තුළ මන්ත්‍රිවරු හිරවී සිටියදී ඉන්ජිනේරු අංශයේ නිලධාරීන් විසින් සෝපානය දෙවැනි මහල දක්වා ඉතා අමාරුවෙන් ක්‍රියාකරවීමේදී අඩියක් පමණ තිබියදී යළිත් ඇනහිටීම නිසා මන්ත්‍රිවරු සෝපානයෙන් බිමට පැනගෙන ඇත.

සෝපානය තුළ හිරවී සිටියදී බන්දුල ගුණවර්ධන මන්ත්‍රිවරයා 'ඉතිපිසෝ' ගාථාව කියමින් සිටි බවත්, තමා ඇතුළු කාටත් එම කාලය තුළ මරණ බිය ඇතිවූ බවත් රාජ්‍ය ඇමැති රංජිත් අලුවිහාරේ 'මව්බිම'ට පැවැසීය.

දිනේෂ් ගුණවර්ධන මහතා: විදුලි සෝපානයෙන් අපි උඩට එන්නේ. එය මඳක් උඩට ගිහින් නතර වුණා. එහි උපදෙස් අනුව එහි දුරකතනයෙන් අපි කතා කළා. මම 83දී මේ පාර්ලිමේන්තුවට ආවේ. කවදාවත් මෙවැනි සිදුවීමක් වුණේ නෑ. මේ වගේ හිර කරලා මරණ කුමන්ත්‍රණයකට අපි අහුවෙලා. ලක්‍ෂ ගණන් අපි මෙහි මුදල් නාස්ති කරලා තියෙන්නේ. අපි විනාඩි 25ක් මේ සෝපානේ හිරවුණා. යම් මන්ත්‍රි කෙනකුගේ ජීවිතයට හානියක් වුණා නම් එය බරපතළ ප්‍රශ්නයක් වෙනවා. මේක සුළුවෙන් තැකිය යුතු නෑ.

විදුලි සෝපානය නඩත්තු කරගන්න බැරි පාර්ලිමේන්තුවක් මේක. අපිට විදුලි සෝපාන දෙකයි තියෙන්නේ. ඒකෙ වෙන කාටවත් යන්න බෑ. කථානායකතුමන් යන්නෙත් මේකේ. ඔබතුමාත් පඩිපෙළින් යන්න. මේක භයානකයි. අපි මහජන නියෝජිතයෝ. මේ නිලධාරීන් මේ ගැන සොයා බැලිය යුතුයි. කරුණාකරලා මේ ගැන සොයා බලන්න.

බන්දුල ගුණවර්ධන: සභානායකතුමා මේ පාර්ලිමේන්තුවට ඇවිල්ලා අවුරුදු තිහක් වෙනවා. තිස් අවුරුද්ද තුළම නරක අත්දැකීම් තිබෙනවා. සෝපානය ඇරගන්න බැරි වුණා නම් එකසැරේ ‍ෙදාළොස්දෙනෙක් චුත කරන්න ලැබෙනවා. විදුලි සෝපානය එක සැරේම නැවතුණා. තට්ටු කළාට ඇරෙන්නේ නෑ. කවුරුත් ඇත්තෙත් නෑ. ඊට පස්සේ තමයි හීන්දාඩිය දාන්න ගත්තේ.

විමල් වීරවංශ මහතා: ඕනම විදුලි සෝපානයක බර වැඩි නම් නාදයක් එනවා. මේකෙ එහෙම නාද වුණේ නෑ. ටෙලිෆෝන් එකක් තිබුණා. ඒකට උත්තර දෙන්න කෙනෙකුත් නෑ. මෙකේ කොළඹ දිස්ත්‍රික්කයේ අපේ මන්ත්‍රිවරු ඔක්කොම හිටියා. ගම්මන්පිල මන්ත්‍රිතුමා හැර. අපි ඔක්කොටම මොනව හරි වුණා නම් ගම්මන්පිල මන්ත්‍රිතුමා විතරයි ඉතුරු වෙන්නේ. කථානායකතුමා යන්න එපා මෙකේ. මොකද ඔබතුමා ජනාධිපති අපේක්‍ෂකයා වෙන්නනේ ඉන්නේ.

කරු ජයසූරිය: නෑ. නෑ. මගේ එහෙම එකක් නෑ. යන්න ඕන වෙලාවට අපි කාටත් යන්නම වෙනවා.

ලක්‍ෂ්මන් කිරිඇල්ල: මේක බරපතළ ප්‍රශ්නයක්. පාර්ලිමේන්තුවේ මේ වගේ ප්‍රශ්නයක් වුණාම මේකේ වගකීම ගන්න කවුරුත් නෑ. විනාඩි 15ක් හිරවුණා. මේක හරියට විසඳන්න. අපි අලුත් විදුලි සෝපානයක් ගේන්න ඕනේ. මේ ගැන පරීක්‍ෂණයක් කරන්න ඕනේ. ඒ වගේම අපේ මන්ත්‍රිවරු ලක්‍ෂ 2යි තියෙන්නේ. ඒකත් මදි. මේ ගැන පරීක්‍ෂණයක් කරලා වැරැදිකරුවන්ට දඬුවම් දෙන්න ඕනෑ.

දයාසිරි ජයසේකර: සෝපානයේ හිරවෙලා අත්දැකීමක් ලබාගත්තා. හුස්ම අඩුවෙන් ගන්න කියලා කිව්වා. මන්ත්‍රිවරුන්ගේ රක්‍ෂණය වැඩි කරන්න උත්සාහ කරන්න එපා. අපට රටේ ජනතාවගෙන් ගුටිකන්න සිද්ධ වෙන්නේ.
චන්ද්‍රසිරි ගජධීර: සෝපානය ඇතුළේ ඉතිපිසෝ කියනවා ඇහුණා.මරණයක් ඇති වුණාම කථානායකතුමාගෙන් වන්දි ලබාගන්න පුළුවන් ක්‍රමයක් ඇති කරන්න ඕන.

රවි කරුණානායක: මේකට කවුරුහරි වග කියන්න ඕන. .අද විදුලි සෝපාන 25,800ක් ගොඩනැඟිලිවල පාවිච්චි කරනවා. මේ එකක්වත් ලියාපදිංචි කරලා නැහැ. මේ සෝපාන ලියාපදිංචි කළ යුතු බවට කැබිනට් පත්‍රිකාවක් දානවා. වාර්ෂිකව සියලුම විදුලි සෝපාන ලියාපදිංචි කරලා ඒ ලියාපදිංචි සහතිකය විදුලි සෝපානය තුළ ප්‍රදර්ශනය කරන්න ඕන. පාර්ලිමේන්තුවට අලුතින් විදුලි සෝපාන ගන්න මුදල් වෙන් කළා.

චන්දිම වීරක්කොඩි: මේ පාර්ලිමේන්තුවට පාසල් ශිෂ්‍ය ශිෂ්‍යාවන් එනවා. ඔවුන් මේ සෝපානවලින් යන්නේ. මේ විදියට සෝපාන හිරවුණොත් ඒ ළමයි අපහසුතාවට පත්වෙනවා. ඒ නිසා කථානායකතුමා, පාසල් ළමයින්ට පඩිපෙළ පාවිච්චි කරන්න කියලා දැන්වීමක් ප්‍රදර්ශනය කරන්න. මේක සුළු ප්‍රශ්නයක් නෙවේ. බරපතළ ප්‍රශ්නයක්.

චමින්ද විජේසිරි: කලින් දවසක අගමැතිතුමත් ලිෆ්ට් එකේ හිරවුණා. විපක්‍ෂය දැමූ වළේම අද විපක්‍ෂයත් වැටුණා.

කථානායක කරු ජයසූරිය: මේ සම්බන්ධයෙන් පූර්ණ පරීක්‍ෂණයක් කරනවා. මෙය කුමන්ත්‍රණයක් නොවේ. මම වහාම මේ ගැන අදාළ අංශ ගෙන්නලා පරීක්‍ෂණයක් කරනවා. ඒ ගැන හොයලා බලනවා. මම මේ ගැන කනගාටු වෙනවා. අවශ්‍ය නම් අපි අලුත් විදුලි සෝපානයක් ගමු.

සංචාරක රාජ්‍ය ඇමැති රංජිත් අලුවිහාරේ සමඟ දිනේෂ් ගුණවර්ධන, බන්දුල ගුණවර්ධන, විමල් වීරවංශ, දයාසිරි ජයසේකර, චන්දිම වීරක්කොඩි, සී.බී. රත්නායක, මහින්ද යාපා අබේවර්ධන, ඩලස් අලහප්පෙරුම, ගාමිණි ලොකුගේ, රංජිත් ද සොයිසා, චන්ද්‍රසිරි ගජධීර යන මන්ත්‍රිවරු පාර්ලිමේන්තුවේ අංක 6 විදුලි සෝපානය තුළ ඊයේ උදේ හිරවී සිටියහ.

විදුලි සෝපානය ක්‍රියාවිරහිතවීමේ සිද්ධියෙන් පසු මන්ත්‍රිවරු පාර්ලිමේන්තුවේ පියගැට පෙළ භාවිත කරනු දක්නට ලැබිණි.

මව්බිම දැන්

තවදුරටත්

අද මව්‍බිමෙන්

තවදුරටත්

අද පුවත්පත

අද කාටූනය

mawbima Cartoon