‘සයිටම්’ විසඳුම

මාලඹේ පෞද්ගලික වෛද්‍ය විද්‍යාලය හෙවත් 'සයිටම්' විරෝධී සටන, ආණ්ඩුව ගෙදර යවන බවට තර්ජනය කිරීම දක්වා දුරදිග ගියේය. සයිටම් විරෝධීන් පැහැදිලිවම ආණ්ඩුවට අභියෝගයක් එල්ල කරනු ලැබීය. සයිටම් වසා දැමීමට ආණ්ඩුව පියවර ගත යුතු යැයි ඔවුහු පැවැසූහ.

පමාවී හෝ ආණ්ඩුව තීරණයක් ගෙන ඇත. සයිටම් ආයතනය තනි පුද්ගල අයිතියෙන් ඉවත් කර පාලක මණ්ඩලයක් යටතට පත්කිරීමට තීරණය කළ බව ජනාධිපතිවරයා ප්‍රකාශ කර තිබේ. මාස ගණනක් තිස්සේ පල්වෙවී පැවැති සයිටම් ප්‍රශ්නයට ආණ්ඩුවෙන් නිශ්චිත පිළිතුරක් ලැබීම සතුටට කරුණකි.
සයිටම් ප්‍රශ්නයට ආණ්ඩුව ක්‍රියාමාර්ග හතරක් යෝජනා කර ඇත. සයිටම් සිසුන්ට රජයේ රෝහල්වල සායනික පුහුණුව ලබාදීම ඉන් පළමු වැන්නයි, දෙවැන්න වන්නේ සයිටම් සිසුන් වෛද්‍ය සභාවේ විභාගයකට යොමු කිරීමයි. නීතිපතිවරයාගේ අනුමතිය සහිතව ශ්‍රී ලංකා වෛද්‍ය සභාව විසින් ඉදිරිපත් කරනු ලබන වෛද්‍ය අධ්‍යාපනය සඳහා වූ අවම ප්‍රමිතීන් සෞඛ්‍ය අමාත්‍යාංශය ගැසට් නිවේදනයක් මඟින් නිකුත් කිරීම තෙවැන්නය. සිවුවැන්න 'සයිටම්' පාලක මණ්ඩලයක් යටතට පත්කිරීමය.

රජයේ මේ යෝජනාවලට සයිටම් විරෝධීන් දක්වා ඇත්තේ සුබවාදී ප්‍රතිචාරයන් නොවේ. විශේෂයෙන් රජයේ වෛද්‍ය නිලධාරීන්ගේ සංගමය මේ යෝජනා පිළිගෙන නැත. 'සායනික පුහුණුව' මත ප්‍රමිතිය ගැන බරපතළ චෝදනාවක් 'සයිටම්' වෙත එල්ල කරන වෛද්‍ය සංගමය රජයේ රෝහල්වල සායනික පුහුණුව ලබාදීමටද විරුද්ධ ය. එහෙත් ඒ විරෝධයෙන් සිදුවන්නේ සයිටම්හි දැනට ඉගෙනුම ලබන සිසු සිසුවියන් මහත් අපහසුතාවකට පත්වීමය. වෛද්‍ය සංගමය කළ යුතුව තිබුණේ සයිටම් ආයතනයට පළමුවැනි සිසු කණ්ඩායම බඳවා ගැනීමේදීම විරුද්ධ වීමය. රාජපක්ෂ ආණ්ඩුව ඊට ප්‍රතිචාරයක් නොදැක්වූවා නම් සමස්ත ලංකා වෛද්‍ය වැඩ වර්ජනයක් කැඳවීමට වෛද්‍ය සංගමයට ශක්තිය තිබිණි. ෂයිලොක්ලා මෙන් මස් රාත්තලම නොඉල්ලා වෛද්‍ය සංගමය දැන්වත් යථාර්ථයට මුහුණදී ප්‍රශ්නයට කාලීන පිළිතුරක් සොයා ගත යුතුය.

සයිටම් ප්‍රශ්නය පසුගිය අවුරුදු දෙකේ හිටි අඩියේ මතුවූවක් නොවේ. එය අවුරුදු හත අටක් පැරැණි ප්‍රශ්නයකි. වෛද්‍ය සංගමය හෝ අ.වි.ශි.බ.ම. කියන පරක්කුවෙන් තීන්දුවක් දීමට ආණ්ඩුවකට හැකියාවක් නැත. දෙපාර්ශ්වයටම සවන් දී කාටත් සාධාරණ විසඳුමක් ලබාදීමේ වගකීම ආණ්ඩුවට ඇත. එනිසා ආණ්ඩුව මේ ඉදිරිපත් කර ඇති යෝජනාවලින් කිසිදු පාර්ශ්වයකට අසාධාරණයක් වන බවක් පෙනෙන්නට නැත. අසාධාරණය වී ඇත්තේ විශ්වවිද්‍යාලවල වෛද්‍ය පීඨ සිසුන්ට හා සයිටම් සිසුන්ටය. දෙපාර්ශ්වයේම අධ්‍යාපන කටයුතු මේ නිසා ඇනහිට ඇත. වරින්වර වැඩ වර්ජනය කරන වෛද්‍ය සංගමය නිසා දුෂ්කරතාවට පත්ව ඇත්තේ රෝගී ජනතාවය.

සයිටම් අර්බුදය දඩමීමා කරගෙන ආණ්ඩුව අපහසුතාවට පත්කිරීමට මානබලන පිරිසක්ද සිටිති. විශේෂයෙන් අන්තර් විශ්වවිද්‍යාල ශිෂ්‍ය බල මණ්ඩලය මේ විරෝධයේදී පරිස්සම් විය යුත්තේ ඒ නිසාය. රාගම පෞද්ගලික වෛද්‍ය විද්‍යාල ප්‍රශ්නයට ශිෂ්‍යයන් දැක්වූ විරෝධය අවසානයේ නතර වූයේ ආණ්ඩුව පෙරළීමේ සටනක් දක්වා දුර දිග යෑමෙනි. සයිටම් විරෝධයද එවැනි මාර්ගයකට ඇදී යමින් පවතී. ශිෂ්‍යයන් පරිස්සම් විය යුත්තේ ඒ නිසාය. ආණ්ඩුව විසඳුමක් දී තිබේ. දැන් කළ යුත්තේ ඒ පිළිබඳව සාකච්ඡා කර අවසන් විසඳුමකට පැමිණීම මිස කැත්තට පොල්ල මෙන් සිටීම නොවේ.