පක්ෂ 19ක් පොහොට්ටුවට එක්වීමට එකඟ වෙයි

  👤  2482 readers have read this article !
By mawbima 2017-10-19

සිදත් මෙන්ඩිස්, ඉෂාරා සිල්වා

ඉදිරියේදී පැවැත්වීමට නියමිත ඕනෑම මැතිවරණයකට ශ්‍රී ලංකා පොදුජන පෙරමුණ සමඟ සන්ධානගත වී තරග කිරීම සඳහා මේ වන විටත් පාර්ලිමේන්තුව නියෝජනය කරන ප්‍රධාන දේශපාලන පක්ෂ හතරක් සහ පාර්ලිමේන්තුව නියෝජනය නොකරන දේශපාලන පක්ෂ 15ක් එකඟතාව පළකර තිබේ.
දිනේෂ් ගුණවර්ධන මහතාගේ නායකත්වයෙන් යුත් මහජන එක්සත් පෙරමුණ, විමල් වීරවංශ මහතා නායකත්වය දරන ජාතික නිදහස් පෙරමුණ, උදය ගම්මන්පිල මහතාගේ නායකත්වයෙන් යුත් පිවිතුරු හෙළ උරුමය සහ වාසුදේව නානායක්කාර මහතා නායකත්වය දරන නව වාමාංශික පෙරමුණ ප්‍රධාන වශයෙන් සන්ධාන ගතවීම සඳහා කැමැත්ත ප්‍රකාශ කර ඇත.

ප්‍රගතිශීලී පෙරමුණ සහ ජනතා සේවක පක්ෂය ඊයේ (18දා) බත්තරමුල්ල නෙලුම් මාවතේ පිහිටි ප්‍රධාන පක්ෂ කාර්යාලයේ පැවැති සාකච්ඡාවකින් අනතුරුව සන්ධාන ගතවීම සඳහා එකඟ වී තිබේ.

දේශපාලන පක්ෂවලට අමතරව විවිධ ක්‍ෂේත්‍රයන් නියෝජනය කරන සංවිධාන 20කට වැඩි සංඛ්‍යාවක් සන්ධානගතවී මැතිවරණයට තරග කිරීම සඳහා එකඟතාව පළකර ඇති බවද ශ්‍රී ලංකා පොදුජන පෙරමුණ පක්ෂයේ ජේ‍යෂ්ඨ සාමාජිකයකු 'මව්බිම'ට සඳහන් කෙළේය.

මේ අතර හිටපු නියෝජ්‍ය අමාත්‍ය විනයාගමූර්ති මුරලිදරන් මහතා නායකත්වය දරන දෙමළ එක්සත් නිදහස් පෙරමුණ, සෝමවංශ අමරසිංහ මහතාගේ නායකත්වයෙන් බිහි වූ ජනතා සේවක පක්ෂය, නෙල්සන් පෙරේරා මහතාගේ නායකත්වයෙන් යුත් ශ්‍රී ලංකා ප්‍රගතිශීලී පෙරමුණ, ආචාර්ය නිව්ටන් පීරිස් මහතාගේ නායකත්වයෙන් යුත් ශ්‍රී ලංකා ලිබරල් පක්ෂය මෙලෙස ශ්‍රී ලංකා පොදුජන පෙරමුණ සමඟ සන්ධානගත වීම සඳහා තීරණය කර තිබේ.

අද මව්‍බිමෙන්

තවදුරටත්

මව්බිම දැන්

තවදුරටත්