අපේ සමහර දරුවන් හිතනවා ජීවිතේ තියෙන්නේ ජංගම දුරකතනය ඇතුළේ කියලා

  👤  3345 readers have read this article !
By mawbima 2017-11-17

අද සමහර දරුවන් සිතනවා තමාගේ ජීවිතය තියෙන්නේ ජංගම දුරකතනය ඇතුළේ කියලා. තමන්ගේ ජීවිතය තියෙන්නේ ජංගම දුරකතනය ඇතුළේ කියා සිතන සමහර දරුවන් තමන්ගේ අම්මට තාත්තට වඩා ජංගම දුරකතනයට ආදරේ කරන බව ජනාධිපති මෛත්‍රිපාල සිරිසේන මහතා මහනුවර දී පැවැසීය.
මහනුවර පුෂ්පදාන විදුහලේ ත්‍යාග ප්‍රදානෝත්සවයට සහභාගි වෙමින් ජනාධිපතිවරයා මෙසේද සඳහන් කළේය.

මසකට අවම වශයෙන් පාසල් 4කවත් උත්සවවලට මම සහභාගි වෙනවා. මගේ දිනපොත අනුව මම වැඩි දින ගණනක් සහ කාලයක් වෙන් කරගෙන තියෙන්නේ පාසල් සඳහායි. පාසල්වල උත්සවවලට යන්න මගේ විශේෂ කැමැත්තක් තිබෙනවා. එහිදී දරුවන්ගේ අධ්‍යාපන කටයුතු නඟාසිටුවීම සඳහා රජයක් ලෙස කරන මෙහෙවර කොතෙක් දුරට සාර්ථකද, අඩුපාඩුකම් මොනවාද, ඒවා නිවැරැදි කර ගැනීමට ඇති යෝජනා මොනවාද යන්න පිළිබඳව මට සොයා බැලීමට හැකි වෙනවා. පාසල්වල අප දකින යහපත් පැත්ත මෙන්ම දුෂ්කරතාවන් පිළිබඳවත් ඒ මඟින් මට දැගන්න හැකියාව ලැබෙනවා.

මම දැන් දින කිහිපයකට පෙර කොළඹ අලුත් නිවාස යෝජනා ක්‍රමයක් විවෘත කරන්න ගියා. එහි නිවාස 450ක් පමණ තිබුණා. ඒ නිවාස හිමි වුණේ කොළඹ දුගී පැල්පත්වල වෙසෙන ජනතාවටයි. මම එහි මවුපියන් සමඟ මෙන්ම දරුවන් සමඟත් කතා කළා. මම එහි සිටි දරුවන්ගෙන් හා මවුපියන්ගෙන් විමසා සිටියා මේ දරුවන් පාසල් යන්නේ නැත්තේ ඇයි කියලා. පසුව උත්සව සභාවට පැමිණි නිලධාරීන් කීවා මේ ළමයින්ට පමණක් නොව පාසලක් නැති ළමයි බොහෝමයක් කොළඹ ඉන්නවා කියලා. කොළඹ නගරයේ ජනප්‍රිය පාසල් සඳහා කීර්තියක් තිබෙනවා. දිවයිනේ බොහෝ ප්‍රදේශවල ජීවත්වන වැඩිම ලකුණු ගන්නා දරුවන් කොළඹ පාසල්වලට ඇතුළත් වෙනවා. නමුත් කොළඹ ප්‍රදේශයේ පාසලක් නැති දරුවන් දහස් ගණනක් සිටිනවා. කොළඹ පාසල්වල අධ්‍යාපනය ලබන දරුවන්ගෙන් 60%ක් කොළඹ ප්‍රදේශයේ ජීවත් වන දරුවන් නෙවෙයි. අධ්‍යාපනය සඳහා පවතින තරගකාරීත්වය තුළ ඇතිවී ඇති මේ අවාසනාවන්ත තත්ත්වය මගේ ජීවිතයේ වසර 50ක දේශපාලන ඉතිහාසය තුළ මම දැනගෙන හිටියේ නැහැ. මම ඒ බව දැනගත්තේ එදා බව මම අවංකවම කියන්න ඕනේ. මම ඒ වෙලාවේ අධ්‍යාපන නිලධාරීන්ගෙන් විමසා සිටියා මේ ගැන කටයුතු නොකළේ ඇයි කියලා. ඔවුන් කීවා උතුරු කොළඹට, මැද කොළඹට අලුතින් පාසල් ඉදිකරන්න මීට පෙර පැවැති ආණ්ඩු කාලවලදිත් මේ ආණ්ඩුවෙනුත් ඉල්ලා තිබුණත් තවම ඒ සඳහා සූදානමක් නැහැ කියලා.

මම අද කොළඹ සිට නුවරට එනවිට අද පත්තර බලමින් ආවේ. එක පත්තරේක මුල් පිටුවේ තිබූ කොටසක් මම අරගෙන ආවා. ඒ පත්තරේ මුල් පිටුවේ තියෙනවා දවස් තුනට අලුත බැඳපු යුවළක්, පාසල් දියණියක්, කපුවෙක්, වෙන්නප්පුවේ තුනක්, අතුරුගිරියේ කෝටිපතියෙක් ඇතුළු අට දෙනෙක් එල්ලී මිය යයි කියලා. එතැන අලුත බැඳපු යුවළ ගැන කියෙව්වේ නැහැ. පාසල් දියණියක් කියන එක කියෙව්වා. දරුවගේ වයස අවුරුදු 10යි. මේ මරණ සියල්ලම සියදිවි නසා ගැනීම්. අලුත බැඳපු යුවළ දින හයකින් හතකින් සියදිවි නසාගෙන. එයට හේතුව තවත් විවාහයක් කරගත් අයෙක් නැවත විවාහ වීම. මේ පාසල් දරුවාගේ වයස අවුරුදු 10යි. පත්තරේ තියෙනවා සියදිවි නසා ගත්තේ මේ දරුවා පාසලේ තවත් දරුවෙක් ළඟ තිබුණු ජංගම දුරකතනයක් සොරකම් කළ නිසා පන්ති භාර ගුරුතුමිය ටෙලිෆෝන් හොරා කීවා. ඉන් දරුවා ලැජ්ජාවට පත් වුණා. පාසලේ අනිත් ළමයි මේ ළමයට ටෙලිෆෝන් හොරා කියන නිසා පාසල් යන්න බැහැ කීවා. අවසානයේ මේ දරුවා සියදිවි නසාගෙන තිබෙනවා. වැඩිහිටියන් සැලකිලිමත් විය යුතුයි මෙවැනි කාරණාවලදී.
මහනුවර - ගයා ශ්‍රී කාරියවසම්

අද මව්‍බිමෙන්

තවදුරටත්

මව්බිම දැන්

තවදුරටත්

අද පුවත්පත

අද කාටූනය

mawbima Cartoon