මෛත්‍රි මහින්ද එකතු කරන්න අලුත් කපුවෙක්

  👤  3342 readers have read this article !
By mawbima 2017-12-06

ඩබ්ලිව්. කේ. ප්‍රසාද් මංජු, අනුරාධපුර - එරන්ද ශෂිප්‍රිය

රටේ ඉදිරි ගමනට ශ්‍රී ලංකා නිදහස් පක්ෂයේ සහ ඒකාබද්ධ විපක්ෂයේ සමඟිය අත්‍යවශ්‍ය නිසා එම පාර්ශ්ව දෙක සමඟි කිරීම සඳහා ජනාධිපති මෛත්‍රිපාල සිරිසේන මහතා සහ හිටපු ජනාධිපති මහින්ද රාජපක්ෂ මහතා
සමඟ...තමා කඩිනමින් සාකච්ඡා කිරීමට බලාපොරොත්තු වන බව ජාතික නිදහස් පෙරමුණ නියෝජනය කරන ඒකාබද්ධ විපක්ෂයේ අනුරාධපුර දිස්ත්‍රික් පාර්ලිමේන්තු මන්ත්‍රි වීරකුමාර දිසානායක මහතා 'මව්බිම'ට ප්‍රකාශ කළේය.

රටේ ජාතික ආරක්ෂාව තහවුරු කරගැනීම රටේ ආර්ථිකය විජාතිකකරණයෙන් වළක්වා ගැනීම යන ප්‍රධාන කරුණු දෙක වෙනුවෙන් ජනාධිපති මෛත්‍රිපාල සිරිසේන හා හිටපු ජනාධිපති මහින්ද රාජපක්ෂ මහත්වරුන් සමඟි විය යුතු බව ඒ මහතා පෙන්වා දෙයි.

2020 ජනාධිපතිවරණය ජයගැනීමට නම් ශ්‍රී ලංකා නිදහස් පක්ෂයත් ඒකාබද්ධ විපක්ෂයත් අනිවාර්යයෙන්ම සමඟි විය යුතු බවත් පළාත් පාලන මැතිවරණයට වෙන්ව තරග කර ඉන් පසුව එක්වීම අපහසු නිසා එම මැතිවරණයට පෙර මෙම කණ්ඩායම් දෙක එක්වී එක් කණ්ඩායමක් බවට පත්විය යුතු බවත් දෙපාර්ශ්වයටම සාධාරණ ලෙස ශ්‍රී ලංකා නිදහස් පක්ෂයේ තනතුරු ලබාදිය යුතු බවත් වීරකුමාර දිසානායක මහතා ප්‍රකාශ කරයි.

මෙම සමඟි වීම සඳහා දෙපාර්ශ්වයෙන්ම ඉදිරිපත් වී ඇති කොන්දේසි ගැන යළිත් වරක් තමා ජනාධිපති මෛත්‍රිපාල සිරිසේන මහතාත් හිටපු ජනාධිපති මහින්ද රාජපක්ෂ මහතාත් සමඟ සාකච්ඡා කර කෙසේ හෝ මෙම සමඟිය සිදුකරන බවත් ඒ ගැන ජාතික නිදහස් පෙරමුණේ නායක විමල් වීරවංශ මහතාටද දැනුම් දෙන බවත් වීරකුමාර දිසානායක මහතා පෙන්වා දෙයි.

මෙම ක්‍රියාවලිය සාර්ථක කර ගැනීම සඳහා තමන් උපරිම උත්සාහයක් ගන්නා බවත් එය සාර්ථක කරගැනීමට නොහැකි වුවහොත් රටේ ජාතික ආරක්ෂාව සහ රටේ දේශීය ආර්ථිකය ශක්තිමත් කිරීම වෙනුවෙන් තමන් තීරණයක් ගන්නා බවත් වැඩිදුරටත් අදහස් දැක්වූ පාර්ලිමේන්තු මන්ත්‍රි වීරකුමාර දිසානායක මහතා ප්‍රකාශ කළේය.
මේ අතර මාධ්‍ය නිවේදනයක් නිකුත් කරමින් දිසානායක මන්ත්‍රිවරයා පවසන්නේ ජයග්‍රහණයේ මෙන්ම දේශපාලනයේ කිසිම ස්ථානයකට බෙදීමේ ලකුණු හෝ අඩු කිරීමේ ලකුණු අදාළ නොවන බවයි. ජයග්‍රහණයේ මෙන්ම දේශපාලනයේ ලකුණු වන්නේ එකතු කිරීම සහ වැඩි කිරීමයි.

සැබෑ ජනතා නායකයන්ට ජනතාවගේ ජයග්‍රහණ වෙනුවෙන් කළ නොහැක්කක් තිබිය නොහැකි බවත්, යන්නට බැරි තැනක් තිබිය නොහැකි බවත්, නමන්ට බැරි හිසක් නොතිබෙන බවත් එමෙන්ම හොඳ කොන්දක් තිබිය යුතු බවත් මන්ත්‍රිවරයා නිකුත් කළ දීර්ඝ නිවේදනය අවසානයේ සඳහන් කරයි.

අද මව්‍බිමෙන්

තවදුරටත්

අද පුවත්පත

අද කාටූනය

mawbima Cartoon