ජනාධිපතිවරයා ධුරයෙන් ඉවත් කිරීමට ව්‍යවස්ථා කුමන්ත්‍රණයක් ක්‍රියාත්මක වෙනවා - හිටපු ක්‍රීඩා ඇමැති දයාසිරි ජයසේකර

  👤  2423 readers have read this article !
By mawbima 2018-07-22

ඩබ්ලිව්. කේ. ප්‍රසාද් මංජු

ජනාධිපති මෛත්‍රිපාල සිරිසේන මහතා ජනාධිපති ධුරයෙන් ඉවත් කිරීම සඳහා සිදුවන ආණ්ඩුක්‍රම ව්‍යවස්ථා කුමන්ත්‍රණය පිළිබඳ සොයා බලා පාර්ලිමේන්තුවට හෙළිකරන ලෙස තමා කථානායක කරු ජයසූරිය මහතාගෙන් ඉල්ලීමක් කරන බව හිටපු ක්‍රීඩා අමාත්‍ය දයාසිරි ජයසේකර මහතා "ඉරිදා මව්බිම" පුවත්පතට ප්‍රකාශ කළේය.

නව ආණ්ඩුක්‍රම ව්‍යවස්ථාවක් ඇති කිරීම සඳහා විශේෂඥ කමිටුව විසින් සම්පාදනය කරන ලද දළ කෙටුම්පතට ජනාධිපතිවරයා ඉවත් කිරීම සඳහා ඡේදයක් ඇතුළත්ව තිබෙන බවත්, අග්‍රාමාත්‍යවරයාට, කථානායකවරයාට සහ විපක්‍ෂ නායකවරයාට එක්වී ජනාධිපතිවයා ඉවත් කිරීමට හැකි ක්‍රමවේදයක් එහි සඳහන් වී තිබෙන බවත් දයාසිරි ජයසේකර මන්ත්‍රිවරයා පෙන්වා දෙයි. රටේ පොදු මහජනතාවගේ ඡන්දයෙන් තේරී පත්වන විධායක ජනාධිපතිවරයා එසේ ඉවත් කිරීමට සැලසුම් කිරීම කුමන්ත්‍රණයක් බවත්, මේ කුමන්ත්‍රණය පිටුපස සිටින්නේ කවුරුන්ද කියා හෙළිදරව් කරන ලෙසට කථානායකවරයාගෙන් ඉල්ලා සිටින බවත්, දයාසිරි ජයසේකර මහතා කියා සිටී.

අග්‍රාමාත්‍ය කාර්යාලට සම්බන්ධ පුද්ගලයකු මෙම විශේෂඥ කමිටුව නියෝජනය කරන බවත්, එම පුද්ගලයාගෙන් විවිධ බලපෑම් එල්ලවීම නිසා මෙම විශේෂඥ කමිටුවේ අර්බුදයක් හටගෙන තිබෙන බවත් දයාසිරි ජයසේකර මන්ත්‍රිවරයා සඳහන් කරයි.

19 වැනි ආණ්ඩුක්‍රම ව්‍යවස්ථා සංශෝධනය මඟින් ජනාධිපතිතුමාගේ බලතල අඩුකර අග්‍රාමාත්‍යවරයාගේ බලතල වැඩිකර තිබෙන බවත්, අග්‍රාමාත්‍යවරයාට පිස්සු හැදුණත් තනතුරෙන් ඉවත් කිරීම සඳහා කිසිදු වගන්තියක් 19 වැනි ආණ්ඩුක්‍රම ව්‍යවස්ථා සංශෝධනයට ඇතුළත් කර නොමැති බවත් පාර්ලිමේන්තු මන්ත්‍රි දයාසිරි ජයසේකර මහතා පෙන්වා දෙයි.

මෙම කරුණු සැලකිල්ලට ගත්විට ජනාධිපතිවරයාට එරෙහිව ආණ්ඩුක්‍රම ව්‍යවස්ථා කුමන්ත්‍රණයක් ක්‍රියාත්මක වන බවත් මෙය ඉතා බරපතළ කාරණයක් බවත් වැඩිදුරටත් අදහස් දැක්වූ පාර්ලිමේන්තු මන්ත්‍රි දයාසිරි ජයසේකර මහතා ප්‍රකාශ කළේය.

අද මව්‍බිමෙන්

තවදුරටත්

මව්බිම දැන්

තවදුරටත්

අද පුවත්පත

අද කාටූනය

mawbima Cartoon