පක්ෂ නායකයෝ තිදෙනෙක් හදිසියේම මහින්ද හමුවෙති

  👤  3088 readers have read this article !
By mawbima 2018-08-10

රජයේ අමාත්‍යවරුන් වන ශ්‍රී ලංකා මුස්ලිම් කොංග්‍රස් නායක රාවුෆ් හකීම්, ප්‍රජාතන්ත්‍රවාදී ජනතා පෙරමුණේ නායක මනෝ ගනේෂන් හා ඊ.පී.ඩී.පී. නායක පාර්ලිමේන්තු මන්ත්‍රි ඩග්ලස් දේවානන්දා මහත්වරු ඊයේ (09දා) පාර්ලිමේන්තුවේදී හිටපු ජනාධිපති මහින්ද රාජපක්‍ෂ මහතා හමුවී විශේෂ සාකච්ඡාවක නිරත වූහ.

එම සාකච්ඡාවට ඒකාබද්ධ විපක්‍ෂයේ ඩලස් අලහප්පෙරුම, උදය ගම්මන්පිල, සුසිල් ප්‍රේමජයන්ත හා මහින්ද යාපා අබේවර්ධන මන්ත්‍රිවරුද එක්ව සිටියහ.

පළාත් සභා ඡන්දය පැරැණි ක්‍රමයට පැවැත්වීම සඳහා ඒකාබද්ධ විපක්‍ෂයේ එකඟතාව ලබා දෙන ලෙස ඔවුන් හිටපු ජනාධිපතිවරයා හමුවී ඉල්ලීමක් කර ඇති අතර මහින්ද රාජපක්‍ෂ මහතා ඇතුළු එම අවස්ථාවට සහභාගි වූ ඒකාබද්ධ විපක්‍ෂයේ මන්ත්‍රිරු ඒ සඳහා පූර්ණ එකඟතාව පළ කර තිබේ.

පළාත් සභා ඡන්දය පැරැණි ක්‍රමයට පවත්වන ලෙස ඔවුන් ඊට කලින් අගමැති රනිල් වික්‍රමසිංහ මහතා හමු වී ඉල්ලා ඇති අතර ඒ සඳහා පාර්ලිමේන්තුවේ තුනෙන් දෙකක අනුමැතිය අවශ්‍ය වන බැවින් ඒකාබද්ධ විපක්‍ෂයේ සහයෝගය ලබා ගන්නා ලෙස අගමැතිවරයා ඔවුන්ට දැනුම් දී තිබූ බවද මෙහිදී ඔවුන් අනාවරණය කර ඇත.

ඊට අමතරව තවත් දේශපාලන කරුණු ගණනාවක් පිළිබඳවද ඔවුන් එම හමුවේදී සාකච්ඡා කර ඇති බවද වාර්තා වේ.

අද මව්‍බිමෙන්

තවදුරටත්

මව්බිම දැන්

තවදුරටත්

අද පුවත්පත

අද කාටූනය

mawbima Cartoon