රාජ්‍ය තාන්ත්‍රික සබඳතා මෙන්ම පක්ෂ හා ජනතාව අතර සබඳතා වර්ධනය කර ගනිමු

  👤  2633 readers have read this article !
By mawbima 2018-09-12

ශ්‍රී ලංකාව සහ වියට්නාමය අතර රාජ්‍ය සබඳතා පමණක් නොව, පාර්ලිමේන්තු දේශපාලන පක්ෂ හා ජනතාව අතර සබඳතාත් ශක්තිමත් කරලීම සඳහා පියවර ගත යුතු බව වියට්නාම් අග්‍රාමාත්‍ය ග්යෙන් ෂුන් ෆුක් (ඩ්.ඡ්. ව්ඨභරඥද ඔභචද ර්ථීඩභජ) මහතා පැවැසීය.


වියට්නාම අග්‍රාමාත්‍ය ග්යෙන් ෂුන් ෆුක් (ව්ඨභරඥද ඔභචද ර්ථීඩභජ) මහතා සහ ශ්‍රී ලංකා අග්‍රාමාත්‍ය රනිල් වික්‍රමසිංහ මහතා අතර වියට්නාම අග්‍රාමාත්‍ය කාර්යාලයේදී අද (11වැනිදා) පැවැති ද්විපාර්ශ්වික සාකච්ඡාවේදී දෙරට අතර ආර්ථික වශයෙන් පමණක් නොව දේශපාලන, ආගමික, සමාජයීය හා ව්‍යාපාරික අංශයන් අතර ද හුවමාරු වැඩසටහන් ආරම්භ කරලීමේ වැදගත්කමද අවධාරණය කෙරුණි.


ලබන වසරේ එක්සත් ජාතීන්ගේ ජාත්‍යන්තර වෙසක් උත්සවය වියට්නාමයේ හැනොයි නගරය කේන්ද්‍ර කර ගනිමින් පැවැත්වෙන හෙයින් ඒ සඳහා ශ්‍රී ලංකාවේ සහාය ලබා දෙන ලෙසද ඉල්ලීමක් කෙරිණි.


දෙරට අතර බෞද්ධ නියෝජිත පිරිස් හුවමාරු කර ගැනීමේ වැදගත්කම අවධාරණය කළ වික්‍රමසිංහ මහතා, ශ්‍රී ලංකාවේ හා වියට්නාමය අතර පැවැති ඓතිහාසික සබඳතා පිළිබඳ සොයා බැලීම සඳහා ප්‍රාමාණික විද්වතුන්ගෙන් යුතු ඒකාබද්ධ කමිටුවක් පත් කිරීමේ යෝග්‍යතාව සම්බන්ධයෙන්ද අදහස් පළ කළේය. ඉතා ඉක්මනින්ම මේ කමිටුව පිහිටුවිය යුතු බව වියට්නාම් අග්‍රාමාත්‍යවරයාගේද අදහස විය.


වියට්නාම් ජාතිකයන් විශාල පිරිසක් ශ්‍රී ලංකාවේ සංචාරය කිරීමේ අපේක්ෂාවෙන් පසුවන බැවින්, දෙරට අතර ඍජු ගුවන් සේවා ආරම්භ කිරීමේ අවශ්‍යතාව පිළිබඳව ෂුන් ෆුක් මහතා කරුණු පැහැදිලි කළ අතර ඒ සඳහා අවශ්‍ය සියලු පහසුකම් සැපයීමට ශ්‍රී ලංකාව සූදානම් බව වික්‍රමසිංහ මහතා පැවැසීය. සංචාරක කර්මාන්තයේ උන්නතිය සඳහා දෙරට අතර වීසා රෙගුලාසි තවදුරටත් ලිහිල් කිරීම සම්බන්ධයෙන්ද සාකච්ඡා ළඟදීම ආරම්භ කෙරෙනු ඇත.


ලබන නොවැම්බරයේ ශ්‍රී ලංකාවේ ව්‍යාපාරික නියෝජිත පිරිසගේ වියට්නාම් සංචාරයක් සංවිධානය කිරීමටද ඉන් පසු ව්‍යාපාරික ක්‍ෂේත්‍රයේ නිරන්තර හුවමාරු වැඩසටහන් සංවිධානය කිරීමටද මෙහිදී තීරණය කෙරිණි.


ශ්‍රී ලංකාව සහ වියට්නාමය අතර ධීවර කර්මාන්තය පිළිබඳ අවබෝධතා ගිවිසුමක් සකස් කිරීමට එකඟ වූ දෙරටේ අග්‍රාමාත්‍යවරු, ආර්ථික සම්බන්ධීකරණ කාර්යයන් වෙනුවෙන් ස්ථාපිත කර ඇති ඒකාබද්ධ කමිටුවේ කාර්යයන් කඩිනම් කිරීමේ හා පුළුල් කිරීමේ අවශ්‍යතාවද අවධාරණය කෙරිණි.


කලාපීය සමාජයීය, ආර්ථික හා දේශපාලන ප්‍රවණතාවන් සම්බන්ධයෙන්ද මේ සාකච්ඡාවේදී අදහස් හුවමාරු කර ගැනිණි.
ඉන්දීය සාගරයේ නිදහස් නාවික ගමනාගමනය හා සාමය ආරක්ෂා කරලීම වෙනුවෙන් කැපවී කටයුතු කරන බව අග්‍රාමාත්‍යවරු සහතික කළහ.

අද මව්‍බිමෙන්

තවදුරටත්

මව්බිම දැන්

තවදුරටත්

අද පුවත්පත

අද කාටූනය

mawbima Cartoon