ඉන්දියාවේදී මහින්දට ලැබුණු සැලකිලිවලින් පේන්නේ නිලනොලත් රාජ්‍ය නායකයා එතුමා බවයි

  👤  3504 readers have read this article !
By mawbima 2018-09-18

වර්තමානයේ ඇසෙන්නට ලැබෙන ඝාතන සැලසුම්වලට ආණ්ඩුවේ පවතින බෙදුම් සහ ගැටුම් පාදක වී ඇති බව ප්‍රජාතන්ත්‍රවාදී වාමාංශික පෙරමුණේ නායක පාර්ලිමේන්තු මන්ත්‍රි වසුදේව නානායක්කාර පවසයි.

මන්ත්‍රිවරයා මේ බව පැවැසුවේ ඊයේ (17දා) බොරැල්ල ඇන්.ඇම්. පෙරේරා කේන්ද්‍රයේ පැවැති මාධ්‍ය හමුවක් අමතමිනි.
එහිදී මන්ත්‍රිවරයා මෙසේද පැවැසීය.

අගමැතිතුමාත් ජනාධිපතිතුමාත් අතර රණ්ඩුවක් තියෙනවා කියන එක මුළු රටමත් ලෝකයත් දන්නවා. ස්ථාවරයන්, ප්‍රතිපත්ති, තීරණයන් දෙදෙනාගේ වෙනස්. ගත්තු තීරණ නැවත සලකා බැලීමට ජනාධිපතිතුමා මැදිහත් වීම දැන් සිරිතක් බවට පත්වෙලා.

ඒ වගේම ආණ්ඩුව මුහුණ දෙන ගැටලුවලට හේතු වෙනවා මහින්ද මහත්තයා මේ රටේ ඊළඟ නායකයා ලෙස ඉන්දියාව පිළිගැනීම. ඒ දේ චීනය නම් අනියම් ලෙස හැමදාම පිළිගෙනයි තිබුණේ.

ඉන්දියාවේදී ඔහුට ලැබුණු ගරු සත්කාර, සැලකිලි රාජ්‍ය නායකයකුට ලැබෙන තත්ත්වයෙනුයි ලැබුණේ. මේ තත්ත්වය යටතේ අද වන විට මහින්ද මහත්තයා නිල නොලත් රාජ්‍ය නායකයාගේ තත්ත්වයට පත්වෙලා ඉවරයි.
දේශපාලන මතභේද පැවතීම, ආණ්ඩුවට පැහැදිලි ගමනක් නොතිබීම වැනි හේතුන් නිසා ආණ්ඩුවේ අර්බුදය ඉහළ යනවා. ඒ වගේම ආර්ථිකයේ පහළ වැටීමත් සිද්ධ වෙනවා.

සිරිසේන ජනාධිපති සහ ගෝඨාභය මහතාගේ අතර පවතින හිතවත්කමත් ප්‍රසිද්ධ රහසක්. ඒ හිතවත්කම ගැන කවුරුත් දන්නවා. ජනාධිපතිවරයාට මතුවී ඇති ගැටලුවලට යම් උපදෙස් දීමක් සිදු කළ හැකි පුද්ගලෙයක් තමයි ඔහු. උපදෙස් දෙනවද නැද්ද මම දන්නේ නැහැ.

හමුදාවේ ඉහළ නිලධාරීන් අතර පවතින ගැටලු සහ එවැනි තත්ත්වයක් තුළ කළ යුතු දේ ගැන සිරිසේන මහතාට උදව්වක් විය හැකි කෙනෙක් තමයි ගෝඨාභය මහතා.
අද දේශපාලනයේ ලොකු ඉල්ලුමක් තියෙනවා මහින්ද මහතාව අගමැති කරන්න කියන එක. මේ පාර්ශ්ව දෙකක් අතර ඇති කරගෙන ඇති ආණ්ඩුව සෑදීමේ ගිවිසුම අයින් කළොත් ආණ්ඩුවත් ඉවරයි. එවිට ආණ්ඩුව හදන්න කාවහරි අගමැති ලෙස පත් කළ යුතුයි.

කාගේත් බලාපොරොත්තුවත් ඉල්ලීමත් දැනටමත් නිල නොලත් රාජ්‍ය නායකයා ලෙස ලොවම පිළිගත් මහින්ද මහතා අගමැති ධුරයට පත් කරන්න කියන එකයි.

මේ ගැන භීතියට, කෝපයට හා විරෝධයට පත්වනවා නම් පත්වෙන්නේ එ.ජා.ප.යට. රනිල් වික්‍රමසිංහ මහතාට. ඒ නිසා ඔහුට වුවමනාවක් සහ උනන්දුවක් තියෙනවා එවැනි තත්ත්වයක් ඇතිවීම වළක්වන්න.
අනිත් අතට ජනාධිපතිවරයා ඝාතනය කරනු ලැබුවහොත් වෙන්නේ පාර්ලිමේන්තුවේ වැඩ බලන ජනාධිපති ලෙස අගමැතියි කටයුතු කරන්නේ.

මේවායින් පැහැදිලි වන්නේ මොන දේවල් වුණත් මේ ඝාතන සැලැස්මට හේතු පාදක වන පසුබිමක් නම් තියෙන බවයි. මේ ඝාතන සැලසුම පිළිබඳ හරියාකාර පරීක්‍ෂණ කරගෙන යන්න නොහැකි වී ඇත්තේ පොලිස්පති මේ ගැන සිය උනන්දුව සහ අනුග්‍රහය නොදැක්වීම සහ අවශ්‍ය ආකාරයට කටයුතු කිරීමට ඔහු සූදානම් නැතිකම.

අද මව්‍බිමෙන්

තවදුරටත්

මව්බිම දැන්

තවදුරටත්

අද පුවත්පත

අද කාටූනය

mawbima Cartoon