29

කොළඹ

අවුරුදු දහතුනක් කට්ට කාලා නොලැබුණු ජීවිතය දිනාගත්ත හිරු ස්ටාර් මංගල ඩෙනෙක්ස්

හදගැස්ම

හිරු ස්ටාර් කිරුළේ හිමිකාරයා ඔබ. ඒ ගැන ලොකු සතුටකින් ඇත්තේ...?

මටත් වඩා ප්‍රේක්ෂක ජනතාව ඒ ගැන සතුටු වෙනවා. එයාලගේ සතුට මට ගොඩක් වටිනවා. ලොකු කුඩා හැමෝම මට ආදරය කළා. ඒ ආදරය ගැන අහිංසක සතුටක් මම භුක්ති විඳිනවා. 

තරගයට එද්දිම කිරුළ ගැන බලාපොරොත්තුව තියාගෙනද හිටියේ...?

ජයග්‍රහණය කෙසේ වෙතත් මට නොලැබුණ ජීවිතය දිනන්න මම බලාපොරොතු වුණා. මම මේ වෙද්දි සෑහෙන දුරක් සාර්ථකව ඇවිත් තියෙනවා. මට මේ තැන හදාගන්න උදවු කරපු රෙනෝ සිල්වා මැතිතුමාට, ඒ වගේම හිරු ටී.වී. කණ්ඩායමට මම හදවතින්ම ස්තුතිවන්ත වෙනවා. ඒ වගේම මට උදවු කරපු සංගීත කණ්ඩායම් සහ මම වෙනුවෙන් උදවු කරපු හැමෝටම ස්තූතිවන්ත වෙනවා. 

මංගලගේ හීනය සැබෑ කරගන්න හරිම පාර හිරු ස්ටාර් කියලා කලින්ම හිතුවද..?

ඔව්. මම ඒක විශ්වාස කළා. ඒ විශ්වාසය අද හැබෑ වෙලා තියෙනවා. 

හිරු ස්ටාර් තරගයට ඔබව යොමු කළේ කවුද...?

මම මුලින් නම් රූපවාහිනිය එහෙම එතරම් බලන්නේ නැති කෙනෙක්. ශිරාන් මාධව සහ මනෝජ් සංජය තමයි මේ තරගය ගැන කිව්වේ. ඒ දෙන්නා ඇප්ලිකේෂන් දෙකක් දැම්මා. මගේ බිරියත් මං වෙනුවෙන් ඇප්ලිකේෂන් එකක් දැම්මා. 

බොහෝ රියැලිටි තරගකරුවන් රසික ආකර්ෂණය අඩුවෙයි කියලා පවුල් ජීවිතයේ සමහර කාරණා වසන් කරනවා. හැබැයි ඔබ විවාහකයෙක් කියලා වසන් කළේ නැහැ...?

සැනසීම කියන දෙයට මම පුදුම විදියට පෙරේතයි. ඒකට හානියක් කරගන්න මට ඕන වුණේ නෑ. බොරුවෙන් කපටිකමෙන් දිනන්න මට ඕන වුණෙත් නෑ. එහෙම බොරුවෙන් වංචාවෙන් දිනන්න ඕන වුණා නම් අවුරුදු දහතුනක් කට්ට කන්න ඕනේ නෑ. බිරිය දුකේදි මගේ ළඟ හිටියා. ඉතිං ඇයි මම මගේ බිරිය දරුවන් ගැන හංගන්නේ. මගේ දරුවන්ගේ වාසනාවටත් එක්ක තමයි මේ ජයග්‍රහණය ලැබුණේ. මගේ දුවට අවුරුදු තුනක් වෙද්දි පුතාට අවුරුදු එකහමාරක් වෙද්දි එයාලා මේ දේ දැක්කා. ඒක ඇත්තටම වාසනාවක්. 

හිරු ස්ටාර් කිරුළත් එක්ක ඔබට ලැබිච්ච ත්‍යාගවලිනුත් ඔබට ප්‍රතිලාභ එකතු වුණා නේද...?

මට ලක්ෂ හැටක් වටින අවුඩි මෝටර් රථයක් ලැබුණා. ඒක මම පදිනවා. රුපියල් මිලියනයක මුදල් ත්‍යාගයක්. රුපියල් කෝටියක් වටිනා රූප රචනා සහිත ගීත ඇල්බමයක හිමිකම ලැබුණා. මෙච්චර කල් මම සිංදු කිව්වේ ප්‍රතිලාභයක් බලාගෙන නෙමෙයි. ප්‍රතිලාභ බලාගෙනම මේ ගමන ආවා නම් මම අකැමැති දේවලුත් කරන්න සිද්ධ වෙන්න තිබ්බා. මම මට ලැබිච්ච ත්‍යාග විකුණන්නේ නෑ. ඒවා මගේ ළමයින්ට අයිති දේවල්. මම හැමදාම ප්‍රේක්ෂකයාගේ හිත් සනසන්න සිංදු කියනවා. මගේ ජීවිතය වෙනස් කරපු මගේ දැනුම හදපු අයටත් මම උපරිම දේ කරනවා. 

හිරු ස්ටාර් තරගයට එන්න කලින් මංගලට ජීවත් වෙන්න සිදුවුණ පසුබිම ගැන කිව්වොත්...?

ඒ පසුබිම නම් හරිම අන්තිමයි. මගේ ජීවිතය බින්දුවේ තිබ්බේ. මගේ හදවතේ තිබ්බ ශක්තිය මගේ නෝනා, මගේ දරුවෝ දෙන්නා මගේ වටේ හිටපු අය තමයි මට විශ්වාස කරන්න පුළුවන් වුණේ. මම මුලින් සෞඛ්‍ය දෙපාර්තමේන්තුවේ රැකියාවක් කළා. සංගීතය නිසා මම ඒ රැකියාවත් කාලයකට කලින් අතහැරියා. අවුරුදු ගාණක් කට්ට කෑවා මේ තැන හදාගන්න. 

දැන් ඔබට බොහෝ පිරිසක් ආදරය කරනවා...?

ඇත්තටම පාර්ලිමේන්තු මන්ත්‍රිවරයෙක්ටත් නැති තරමේ ආදරයක් මට ලැබෙනවා. මට කවදාවත් වීරයෙක් වෙන්න ඕන වුණේ නෑ. මට දැනෙන දේ ප්‍රේක්ෂක ජනතාවට දැනුණා. ඒ ගැන සතුටුයි. 

 ගමෙනුත් ලොකු පිළිගැනීමක් ලැබෙන්න ඇති....?

ඔව්. ඒ පිළිගැනීම මට කියලා නිම කරන්න බෑ. මාර සතුටුයි. මට ඒ පිළිගැනීම දකිද්දී ඇස්වලට කඳුළු ආවා. මම කඳුළු හංගන්න කැමැති කෙනෙක්. ඒ ආදරය මාරයි. එයාලා මගේ නමට මුලින් ගායකයා කියන කොටස දාලා එයාලගේ ආදරය ප්‍රකාශ කළා. මට එක පාටක් නැති නිසා හැමෝගෙම ආදරය මට ලැබුණා. 

මංගල බටපොළින් කොළඹට එන එකක් නැද්ද...?

මගේ කකුල් දෙක රිදෙනකල් මං කොළඹ ඇවිද්දා. මේ තරගයේ මුල ඉඳලම බස් එකේම කොළඹ ආපු ගිය කෙනා මම. කොළඹ කොච්චර දුෂ්කරයිද කියලා මගේ දෙපයට දැනිලා තියෙනවා. ගම පුළුවන් තරම්  කොළඹ වගේ කරන්න උත්සාහ කරනවා. ගම දාලා මම කොළඹට එන්නේ නෑ. 

රියැලිටි තරගවලින් ගායකයෝ බිහිවෙනවා. හැබැයි ක්ෂේත්‍රයේ රැඳෙන්නේ ඒ අතරින් කිහිපදෙනයි. මංගලට ක්ෂේත්‍රයේ ගායන තරුවක් ලෙස රැඳිලා ඉන්න පුළුවන් වෙයිද..?

මම තරුවක් නෙවෙයි. මාව තරුවක් විදියට අනෙක් අය දකින එකට කරන්න දෙයක් නෑ. නමුත් මගේ තරු ලකුණු තියෙන්නේ මගේ ගායනයේ. මම සාමාන්‍ය මනුස්සයෙක්. කලා ලෝකයේ පවතින නිර්මාණ ටිකක් කරලා ක්ෂේත්‍රයේ රැඳිලා ඉන්න පුළුවන් කියලා හිතනවා. 

මංගලගේ අලුත් ගීතයක් අහන්න තව කොච්චර කල් යයිද...?

මගේ ගීත නවයක් විතර දැනට තියෙනවා. උඩුගම් බලා යන නිර්මාණ කළේ. ඉදිරියේදී අහස් මාලිගා නාට්‍ය වෙනුවෙන් ගයපු තේමා ගීතයත් අහන්න ලැබෙයි. ඉදිරියටත් හොඳ වටිනාකමක් තියෙන ගීත මගේ හඬෙන් ඇහෙයි. 

මංගල රසිකයෝ ඉල්ලන දේවල් දෙන ගායකයෙක් වෙයිද..?

මෑත කාලයේ ගොඩක් අහන්න ලැබුණේ රසිකයෝ ඉල්ලපු නිර්මාණවලට වඩා මාකටින්වලට කරපු නිර්මාණ. ඒ ගීත රසිකයන්ට බලෙන් අහන්න වුණා. ඒකට ඉතිං කාටවත් වැරැද්දක් කියන්න බෑ. මම ගායනයෙන් තරු ලකුණක් තියලා නිර්මාණ කරනවා. 

මංගල දැන් තියෙන ප්‍රේක්ෂක ආකර්ෂණය අවස්ථා සහ ලැබෙන දේවල් නිසා වෙනස් වෙන චරිතයක් වෙයිද..?

මංගල ඩෙනෙක්ස් එහෙම කවදාවත් වෙනස් වෙන්නේ නෑ. ගායනයේ වෙනස්කම් තියෙයි. මට ඕන චරිතයක් වෙන්න නෙවෙයි. විශේෂිතයෙක් වෙන්න. මම මෙච්චර දේවල් කළේ උඩුගම් බලා යන්න. එවැනි නිර්මාණ එක්ක මම ප්‍රේක්ෂකයන් අතර ඉන්න උත්සහ කරනවා.


තිළිණි කෞශල්‍යා විජේසිංහ

ඊශ්‍රායල පලස්තීන ගැටුම් යලි ආරම්බ වන ලකුණු

භුතයෙක්ගේ ගැටී පාසැල් බස් රථය අනතුරේ - දරුවන් 11ක් රෝහලේ

ඇපල් අද කරන්න යන විශේෂ වැඩේ

බැඳුම්කර වංචාවට ඇලෝසියස් අත්අඩංගුවට

සෞඛ්‍ය සේවා අඩපන වෙන ලකුණු - හෙද නිලධාරීන් වෘත්තීය ක්‍රියාමාර්ගයක
හිටපු මහබැංකු නි.අධිපති පී.සමරසිරි ඇතුළු 4ක් අත්අඩංගුවට

මාලිංග සෙල්ලම් කරන අවසන් ජාත්‍යන්තර තරඟය ගැන හෙළිකරයි

2020 වර්ෂයේදී ඕස්ට්‍රේලියාවේදී පැවැත්වීමට නියමිත විස්සයි-20

08:57 AM Mar 25 2019

වැස්සට දියවුණු ලංකාවේ හීන

08:17 AM Mar 25 2019

වැරදි වැඩ කරලා ආයේ ආපු වෝනර්ත් පරාදයි, පොඩි කට්ටියට මුම්බායි පරාදයි

07:55 AM Mar 25 2019

ඊශ්‍රායල පලස්තීන ගැටුම් යලි ආරම්බ වන ලකුණු

පලස්තීන හමුදා ගාසා තීරය ඔස්සේ  ඊශ්‍රායලය දක්වා එල්ල කරන

02:45 PM Mar 25 2019

තායිලන්ත මැතිවරණයෙන් මිලිටරි හිතවාදී පක්ෂයක් ඉදිරියට

10:56 AM Mar 25 2019

ට්‍රම්ප් නිර්දෝෂයි - මියුලර් වාර්තාවෙන් හෙළිවේ

09:18 AM Mar 25 2019

ජනාධිපතිවරණ අපේක්ෂකයා ගැන ගයන්ත කී කතාව

එක්සත් ජාතික පක්ෂයේ  ඉදිරි ජනාධපතිවරණ අපෙක්ෂකයා පිළිබඳව

01:52 PM Mar 25 2019

මෛත්‍රි expire වේගෙන යන්නේ. expire වුණ දේවල් කෑවොත් බඩේ අමාරැව හැදෙනවා ඒ නිසා expire භාණ්ඩ අලෙවියෙන් අයින්කරන්න ඕනේ

10:39 AM Mar 25 2019

එජාපයවත් පොහොට්ටුවවත් ජනාධිපති අපේක්ෂකයාව තීරණය කරලා නැහැ.

08:53 AM Mar 25 2019

පසුගිය කාටුන්

CARTOON ::: 2019-03-22
CARTOON ::: 2019-03-21
CARTOON ::: 2019-03-20

විල්පත්තු ප්‍රශ්නය

ජගත් වනාන්තර දිනය ලෙස ‘මාර්තු 21’ නම් කර ඇත්තේ එක්සත් ජාතීන්ගේ සංවිධානය විසිනි. මේ දිනය නිමිත්තෙන් පොළොන්නරුව අරලගංවිල වෙහෙරගල විද්‍යාලයේ පැවැති උත්සවයට සහභාගි වූ පරිසර ඇමැතිවරයා වන ජනාධිපති මෛත්‍රිපාල සිරිසේන ප්‍රකාශ කර තිබුණේ  ලංකාව තුළ වාර්ෂිකව සිදුවන වන විනාශයට අනුව දැනට තිබෙන වනාන්තර ටික හෝ රැක නොගතහොත් තව අවුරුදු 15කින් පමණ රට කාන්තාරයක් වනු ඇති බවය. යුද්ධය පැවැති කාලයේ උතුරේ වනාන්තර ටික ප්‍රභාකරන් රැකගත්තද දූෂිත දේශපාලනඥයන්, ඇතැම් රජයේ නිලධාරීන් හා දැව ජාවාරම්කාරයන් හා නීති විරෝධීව වැඩ කරන ව්‍යාපාරිකයන් එකතුවී දකුණේ වනාන්තර ටික විනාශ කළ අතර ඉතුරු වී තිබෙන සියයට 28ක වනාන්තරවලින් 20ක් පමණ උතුරේ තිබෙන්නේ ඒ නිසා බවද ජනාධිපතිවරයා එහිදී අවධාරණය කර තිබිණි.ජනාධිපතිවරයාගේ මේ කතාව සහතික ඇත්තය. ගෙවත්තේ පැළයක් වත් සිටුවන්නේ නැති ඊනියා පරිසර ලෝලීන්, බඩගෝස්තරවාදී පරිසරවේදීන්, දූෂිත දේශපාලනඥයන් සහ ජාතිවාදී දේශප්‍රේමියන් වනාන්තර ඇතුළු පරිසරය සුරැකීම ගැන මහ ඝෝෂා කරද්දී වසරින් වසර ‘වනාන්තර’ ක්‍ෂය වෙමින් යන්නේ වනසතුන්ටද විනාශය අත්කර දෙමිනි. යුද්ධය අවසන් වීමෙන් පසු උතුරේ වනාන්තරවලටත් කට්ටිය අත තැබුවේ ප්‍රභාකරන්ලා නැති බව දන්නා නිසාය. මේ දිනවල ‘විල්පත්තුව’ වන විනාශය බරපතළ ලෙස කතා කිරීමට පටන් ගෙන ඇත. ‘විල්පත්තුව  සංරක්ෂිතය කපා දමා මුස්ලිම් ජාතිකයන්ට ගම්මාන හදා දී ඇති බව එල්ල වී ඇති බරපතළ චෝදනාවය.මහින්ද රාජපක්ෂ මහතාගේ ආණ්ඩු කාලයේ මේ චෝදනාව ඇතුළු පරිසර විනාශය ගැන බරපතළ චෝදනා පරිසරවේදීන්ගෙන් එල්ල විය. එහෙත් බරපතළ ලෙස ‘විල්පත්තුව‘ ගැන චෝදනාව එල්ල වීමට පටන් ගත්තේ සිරිසේන - වික්‍රමසිංහ හවුල් ආණ්ඩුව බලයට පැමිණි පසුය. ගලගොඩඅත්තේ ඥානසාර හිමි ඇතුළු පිරිසක් විල්පත්තුවට ගොස් වන විනාශය ගැන මාධ්‍යයට කතා කළහ. මාධ්‍යයද විල්පත්තුව විනාශ කරලා යැයි ප්‍රවෘත්තිවලින් රටටම අනාවරණය කළේය. මුස්ලිම් අන්තවාදයක් ගැනද මෙහිදී කියවිණි. වරින්වර උඩ එමින් යළි යට යමින් තිබූ ‘විල්පත්තු’ කතාව මේ දිනවල යළි උඩටම පැමිණ ඇත.පාර්ලිමේන්තුවේදී ජනතා විමුක්ති පෙරමුණේ නායක අනුර කුමාර දිසානායක ඇමැති රිෂාඩ් බදියුදීන්ගෙන් ඉකුත් 22දා විමසා තිබුණේ විල්පත්තු වන රක්ෂිතයේ සිදුවී ඇතැයි කියන වන විනාශය පිළිබඳවය. එහිදී ඇමැතිවරයා අවධාරණය කර තිබුණේ එල්ටීටීඊ ප්‍රහාර නිසා පදිංචි නිවාස අතහැර ගිය මුස්ලිම් ජනතාව ලක්ෂ තුනක් නැවත පදිංචි කිරීම ඇමැති බැසිල් රාජපක්ෂගේ නායකත්වයෙන් පත්කළ කමිටුවේ අනුමැතිය මත ආරම්භ කළ බවත්, පසුව සිරිසේන - වික්‍රමසිංහ ආණ්ඩුව යටතේ ජනාධිපති කාර්ය සාධක මණ්ඩලයේ මෙහෙයවීමෙන් නැවත පදිංචි කිරීම් අඛණ්ඩව කරගෙන ගිය බවත්ය.අනුරාධපුර, පුත්තලම දිස්ත්‍රික් දෙක අතරේ විල්පත්තුව වන සංරක්ෂණය තිබෙන අතර මන්නාරම සීමාවේ පරණ මුස්ලිම් ගම්මාන 22ක්, කජුවත්ත නමින් සිංහල ගම්මානයක් හා කතෝලික ගම්මානයක්ද තිබී ඇත.වල්බිහි වී තිබූ මේ ගම්මාන යුද්ධයෙන් පසු වන සංරක්ෂිත ප්‍රදේශ ලෙස නම් කර තිබුණු අතර බැසිල් රාජපක්ෂ කමිටු නිර්දේශ මත යළි ජනතාව පදිංචි කිරීම ආරම්භ කර තිබේ. මේ ප්‍රදේශ ‘වනජීවී’ ප්‍රදේශ නොවන අතර විල්පත්තුව රක්ෂිතයට අයිති නැති බවත් පැවැසේ. එහෙත් බරපතළ ලෙස චෝදනා එල්ල වී ඇත්තේ විල්පත්තුව රක්ෂිතය විනාශ කර ඇති බවටය. ප්‍රශ්නය වන්නෙ අදාළ බලධාරීන් මේ ගැටලුව නිරාකරණය කර ගැනීම සඳහා නිරවුල් පිළිතුරක් නොදීමය.මේ ඉඩම් යළි ලබාදීමේදී පරිසර ඇමැතිවරයාව සිටි අනුර ප්‍රියදර්ශන යාපා පාර්ලිමේන්තුවේදී ප්‍රකාශ කර තිබුණේ පැරණි ගම් රක්ෂිතයට එකතු නොකළ බවය. එහෙත් ඇමැති බදියුදීන් ප්‍රකාශ කර තිබුණේ ඊට වෙනස් කතාවකි. ඔහුට අනුව වන සංරක්ෂණ ප්‍රදේශ ගූගල්  සිතියමක් ආධාරයෙන් නම් කරන විට ජනතාව පදිංචිව සිට නැත. පැරැණි ගම්වල යළි පදිංචි කිරීමේ මුවාවෙන් අවසර ලබාදුන් ඉඩම් ප්‍රමාණයට වඩා ඉඩම් හා වනය එළිපෙහෙළි කර අල්ලාගෙන ඇති බව බදියුදීන් මහතාට එල්ල වන චෝදනාවය. ඇමැතිවරයා පාර්ලිමේන්තුවේදී ප්‍රකාශ කර තිබුණේ තමා විල්පත්තුව වන රක්ෂිතය විනාශ කළ බව ඔප්පු කළොත් ඕනෑම දඬුවමකට යටත් වීමට සූදානම් බවය. මේ ගැන සෙවීමට පාර්ලිමේන්තු තේරීම් කාරක සභාවක් පත්කරන ලෙසද හෙතෙම ඉල්ලීමක් කර ඇත. අදාළ පදිංචි කිරීම් සම්බන්ධව විගණකාධිපතිවරයාගේ වාර්තාවක් ලැබී ඇති අතර ආංශික අධිකරණ කාරක සභාවට එය ඉදිරිපත් කිරීමට නියමිතය. මේ පිළිබඳව සෙවීමට ජනාධිපතිවරයා පත්කළ කමිටුවේ වාර්තාව තවමත් එළියට පැමිණ නැත.වහා කළ යුත්තේ අදාළ වාර්තා පාර්ලිමේන්තුවට ඉදිරිපත් කර ‘විල්පත්තුව‘ ප්‍රශ්නය ගැන පැහැදිලි පිළිතුරක් රටට ලබාදීමය. නොඑසේ නම් වන්නේ වන විනාශය, පාරිසරික ප්‍රශ්නය, මුස්ලිම් අන්තවාදය, සිංහල ජාතිවාදය එකට කැලතී නැති ප්‍රශ්නයක් රට තුළ නිර්මාණය වීමය. නියපොත්තෙන් කැඩීමට ඇති දේ පොරොවෙන් කැපීමට ඉඩතැබිය යුතු නැත. සිංහල-දමිළ ගැටුම මෙන් සිංහල - මුස්ලිම් ගැටුමකට අනාගතයේ ඉඩ නොතැබීමට කවුරු කවුරුත් පරිස්සම් විය යුතුය.
වීඩියෝ